TRS: తెలంగాణ రాజకీయాల్లో కల్వకుంట్ల కవిత స్థాపించిన కొత్త పార్టీకి సంబంధించి కీలక అడుగు పడింది. ఆమె ప్రతిపాదించిన పార్టీ పేరుకు కేంద్ర ఎన్నికల సంఘం (ECI) అధికారికంగా ఆమోదముద్ర వేసింది. గత కొన్ని రోజులుగా పార్టీ పేరుపై నడుస్తున్న ఉత్కంఠకు తెరదించుతూ, ‘తెలంగాణ రక్షణ సేన’ అనే పేరును ఈసీ ఖరారు చేసింది. ఈ మేరకు ఎన్నికల సంఘం అధికారులు స్వయంగా బంజారాహిల్స్లోని కవిత నివాసానికి వెళ్లి, పార్టీ గుర్తింపునకు సంబంధించిన పత్రాలను ఆమెకు అందజేశారు.
గత నెల 25న మేడ్చల్లో భారీ ఎత్తున నిర్వహించిన ఆవిర్భావ సభలో కవిత తన పార్టీ పేరును ‘తెలంగాణ రాష్ట్ర సేన’గా ప్రకటించిన విషయం తెలిసిందే. అయితే, సాంకేతిక కారణాలు మరియు నిబంధనల దృష్ట్యా ఎన్నికల సంఘం ‘తెలంగాణ రక్షణ సేన’ అనే పేరును ఖరారు చేసింది. పేరులో చిన్న మార్పు జరిగినప్పటికీ, సంక్షిప్తంగా పిలుచుకునే ‘టీఆర్ఎస్’ (TRS) అనే పదం మాత్రం మారకపోవడం విశేషం. పాత సెంటిమెంట్ను గుర్తు చేస్తూ మళ్ళీ ‘టీఆర్ఎస్’ పేరుతోనే కవిత రాజకీయ ప్రయాణం సాగనుంది.
ఈ ఆమోదంతో కవిత పార్టీ వర్గాల్లో కొత్త ఉత్సాహం నెలకొంది. పార్టీ రిజిస్ట్రేషన్ ప్రక్రియ అధికారికంగా ముగియడంతో, ఇకపై పూర్తిస్థాయి రాజకీయ కార్యకలాపాలు ప్రారంభించేందుకు కవిత సిద్ధమవుతున్నారు. తెలంగాణ ప్రజల గొంతుకగా, రాష్ట్ర ప్రయోజనాల పరిరక్షణే ధ్యేయంగా ఈ ‘తెలంగాణ రక్షణ సేన’ పనిచేస్తుందని పార్టీ శ్రేణులు ఆశాభావం వ్యక్తం చేస్తున్నాయి. త్వరలోనే పార్టీ జెండా, విధివిధానాలను ప్రజల ముందుకు తీసుకురానున్నారు.