BRS Foundation Day: తెలంగాణ రాజకీయాల్లో కీలక పాత్ర పోషించిన భారత్ రాష్ట్ర సమితి (BRS) నేడు తన 26వ ఆవిర్భావ దినోత్సవాన్ని జరుపుకుంటోంది. సరిగ్గా 2001 ఏప్రిల్ 27న తెలంగాణ ప్రత్యేక రాష్ట్ర సాధనే లక్ష్యంగా పుట్టిన ఈ పార్టీ, నేటితో విజయవంతంగా 25 ఏళ్లు పూర్తి చేసుకుంది. ఈ సందర్భాన్ని పురస్కరించుకుని రాష్ట్రవ్యాప్తంగా పండుగ వాతావరణం నెలకొంది. పార్టీ వర్కింగ్ ప్రెసిడెంట్ కేటీఆర్ ఉదయం 11 గంటలకు తెలంగాణ భవన్లో పార్టీ జెండాను ఎగురవేసి వేడుకలను ప్రారంభించనున్నారు. గ్రామ స్థాయి నుంచి జిల్లా స్థాయి వరకు ప్రతిచోటా జెండా పండుగ నిర్వహించాలని పార్టీ ఇప్పటికే పిలుపునిచ్చింది.
మధ్యాహ్నం 2 గంటల సమయంలో పార్టీ అధినేత కేసీఆర్ అధ్యక్షతన తెలంగాణ భవన్లో ఒక ముఖ్యమైన సమావేశం జరగనుంది. ఈ భేటీకి పార్టీకి చెందిన ఎమ్మెల్యేలు, ఎంపీలు మరియు ఇతర ముఖ్య నేతలు హాజరుకానున్నారు. గత 25 ఏళ్లలో పార్టీ ఎదుర్కొన్న సవాళ్లు, ఉద్యమ కాలం నాటి జ్ఞాపకాలు, పదేళ్ల పాలనలో సాధించిన విజయాలతో పాటు.. ప్రస్తుత రాజకీయ పరిస్థితులపై కేసీఆర్ పార్టీ శ్రేణులకు దిశానిర్దేశం చేయనున్నారు. పార్టీని ప్రజల్లోకి ఎలా తీసుకెళ్లాలి, సంస్థాగతంగా ఎలా బలోపేతం చేయాలనే అంశాలపై ఈ సమావేశంలో చర్చించనున్నారు.
ఈ రోజంతా పార్టీ శ్రేణులు ఉత్సాహంగా గడపనున్నాయి. తెలంగాణ సాధనలో ఈ పార్టీ పోషించిన పాత్రను గుర్తు చేసుకుంటూ పలు చోట్ల సేవా కార్యక్రమాలు కూడా చేపట్టనున్నారు. సాయంత్రం 5 గంటలకు కేసీఆర్ మీడియా ముందుకు వచ్చే అవకాశం ఉంది. ప్రస్తుత రాజకీయ పరిణామాలు మరియు భవిష్యత్తు కార్యాచరణపై ఆయన చేసే ప్రసంగం కోసం అందరూ ఆసక్తిగా ఎదురుచూస్తున్నారు. రాబోయే రోజుల్లో పార్టీని మరింత శక్తివంతంగా మార్చేందుకు ఈ 26వ ఆవిర్భావ దినోత్సవం ఒక కీలక మలుపు కానుంది.