KTR: తెలంగాణ అస్తిత్వంపై, రాష్ట్ర ఏర్పాటుపై బీజేపీ నాయకులు పదేపదే చేస్తున్న అనుచిత వ్యాఖ్యలపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్రస్థాయిలో విరుచుకుపడ్డారు. తెలంగాణ ఏర్పాటును భారత్-పాకిస్థాన్ విభజనతో పోల్చడం బీజేపీ నాయకుల మూర్ఖత్వానికి నిదర్శనమని ఆయన మండిపడ్డారు. బీజేపీ నాయకుల రక్తంలోనే తెలంగాణ వ్యతిరేకత నిండిపోయిందని, పార్లమెంట్ వేదికగా మన రాష్ట్రాన్ని అవమానించడం అత్యంత అహంకారపూరిత చర్య అని కేటీఆర్ ధ్వజమెత్తారు.
త్యాగాల చరిత్రను కించపరుస్తారా?
తెలంగాణ రాష్ట్రం ఎవరి దయాదాక్షిణ్యాల వల్లనో లేదా ఎవరి భిక్ష వల్లనో రాలేదని కేటీఆర్ గుర్తు చేశారు. దశాబ్దాల సుదీర్ఘ పోరాటం, వేలాది మంది యువత ప్రాణ త్యాగాల ఫలితంగా ఏర్పడిన ఈ గడ్డను దేశ విభజన వంటి విషాదకర సంఘటనలతో పోల్చడం ద్వారా బీజేపీ తన కుసంస్కారాన్ని బయటపెట్టుకుందని విమర్శించారు. స్వయంగా ప్రధాని మోడీ నుండి నేడు ఎంపీ తేజస్వి సూర్య వరకు ప్రతి ఒక్కరు తెలంగాణపై విషం చిమ్మడమే పనిగా పెట్టుకున్నారని ఆయన ఆవేదన వ్యక్తం చేశారు.
ఎంపీల మౌనంపై నిలదీత:
సొంత రాష్ట్ర గౌరవం పార్లమెంట్లో మంటగలుస్తున్నా తెలంగాణ నుంచి గెలిచిన ఎనిమిది మంది బీజేపీ ఎంపీలు, అలాగే కాంగ్రెస్ ఎంపీలు మౌనంగా ఉండటం అత్యంత సిగ్గుచేటని కేటీఆర్ దుయ్యబట్టారు. తెలంగాణ ప్రజల ఓట్లు కావాలి కానీ, తెలంగాణ ఆత్మగౌరవం దెబ్బతింటుంటే నోరు విప్పరా? అని ఆయన ప్రశ్నించారు. రాష్ట్ర ప్రయోజనాల కంటే రాజకీయ ప్రయోజనాలే ముఖ్యమని భావిస్తున్న ఈ నాయకులకు ప్రజలు తగిన బుద్ధి చెబుతారని హెచ్చరించారు.
బేషరతు క్షమాపణ చెప్పాల్సిందే:
తెలంగాణను కించపరిచిన తేజస్వి సూర్య తక్షణమే తన వ్యాఖ్యలను వెనక్కి తీసుకుని, తెలంగాణ సమాజానికి బేషరతుగా క్షమాపణ చెప్పాలని కేటీఆర్ డిమాండ్ చేశారు. అంతేకాకుండా, ఈ వ్యాఖ్యలపై బీజేపీ అధిష్టానం కూడా వివరణ ఇవ్వాలని, లేదంటే తెలంగాణను అవమానించడమే ఆ పార్టీ అధికారిక విధానమని భావించాల్సి ఉంటుందని స్పష్టం చేశారు. తెలంగాణ ప్రజల మనోభావాలతో ఆడుకుంటే సహించే ప్రసక్తే లేదని ఆయన తీవ్రంగా హెచ్చరించారు.