kavitha: కాళేశ్వరం ప్రాజెక్టును తిరిగి వినియోగంలోకి తేవాలని రాష్ట్ర ప్రభుత్వం తీసుకున్న నిర్ణయంపై తెలంగాణ జాగృతి అధ్యక్షురాలు కవిత స్పందించారు. ప్రభుత్వం ఈ నిర్ణయం తీసుకోవడాన్ని స్వాగతిస్తున్నామని చెబుతూనే, గత రెండున్నరేళ్లుగా ప్రభుత్వం వ్యవహరించిన తీరుపై ఆమె తీవ్రస్థాయిలో మండిపడ్డారు. హైదరాబాద్లో ఏర్పాటు చేసిన మీడియా సమావేశంలో ఆమె పలు కీలక ఆరోపణలు చేశారు.
ప్రభుత్వ నిర్లక్ష్యం కారణంగానే ఇన్నాళ్లూ పంటలు ఎండిపోయి రైతులు తీవ్రంగా నష్టపోయారని కవిత ఆవేదన వ్యక్తం చేశారు. ఇప్పుడు అకస్మాత్తుగా కాళేశ్వరం ప్రాజెక్టుకు మరమ్మతులు చేస్తామనడం వెనుక అసలు కారణం కమీషన్లేనని ఆమె ఆరోపించారు. కేవలం కమీషన్లు దండుకోవడానికే ఇప్పుడు మరమ్మతుల పేరుతో హడావుడి చేస్తున్నారని విమర్శించారు. ప్రభుత్వ వైఖరి వల్ల రైతాంగం ఇప్పటికే చాలా ఇబ్బందులు ఎదుర్కొందని ఆమె గుర్తు చేశారు.
అవినీతి అంశంపై స్పందిస్తూ.. ప్రస్తుతం మున్సిపల్ శాఖతో పాటు అర్బన్ ఫారెస్ట్రీ విభాగాల్లో పెద్ద ఎత్తున అక్రమాలు జరుగుతున్నాయని కవిత పేర్కొన్నారు. అధికారుల అండదండలతోనే ఈ అవినీతి సాగుతోందని ధ్వజమెత్తారు. ప్రభుత్వం ప్రజల ప్రయోజనాల కంటే స్వప్రయోజనాలకే ఎక్కువ ప్రాధాన్యత ఇస్తోందని ఆమె తన ప్రసంగంలో ఎండగట్టారు.
హైదరాబాద్ అభివృద్ధి విషయంలోనూ ఆమె ఆందోళన వ్యక్తం చేశారు. ‘ఫ్యూచర్ సిటీ’ పేరుతో ప్రభుత్వం తీసుకువస్తున్న కొత్త ప్రణాళికలు కేవలం రియల్ ఎస్టేట్ వ్యాపారానికి లబ్ధి చేకూర్చేలా ఉన్నాయని విమర్శించారు. వ్యాపార ప్రయోజనాల కోసం హైదరాబాద్ నగరం యొక్క ఉనికిని, భవిష్యత్తును పణంగా పెట్టవద్దని ఆమె ప్రభుత్వాన్ని కోరారు. అభివృద్ధి పేరిట నగరానికి నష్టం చేయవద్దని ఆమె హితవు పలికారు.