Revanth Reddy: తెలంగాణ రాజకీయాల్లో ముఖ్యమంత్రి రేవంత్ రెడ్డి మరోసారి తనదైన శైలిలో ప్రత్యర్థులపై విమర్శలు గుప్పించారు. అసెంబ్లీ వేదికగా మీడియా ప్రతినిధులతో మాట్లాడిన ఆయన, బీఆర్ఎస్ అధినేత కేసీఆర్ మరియు మాజీ మంత్రి హరీష్ రావులపై ఘాటు వ్యాఖ్యలు చేశారు. పురాణాలను ఉదాహరణగా తీసుకుంటూ రేవంత్ రెడ్డి చేసిన పోలికలు ఇప్పుడు రాజకీయ వర్గాల్లో హాట్ టాపిక్ గా మారాయి. రాజకీయాల్లో ప్రతిపక్షాల విమర్శలే తనను మరింత బలోపేతం చేస్తున్నాయని ఆయన పేర్కొన్నారు. “రావణాసురుడు ఉండటం వల్లే శ్రీరాముడికి గుర్తింపు వచ్చింది.. శకుని లేకుంటే శ్రీకృష్ణుడి ప్రాధాన్యత తెలిసేదా?” అని ప్రశ్నిస్తూ, కేసీఆర్ ఉండటం వల్లే రేవంత్ రెడ్డికి ఈ స్థాయిలో పేరు వచ్చిందని వ్యాఖ్యానించారు. అలాగే హరీష్ రావును “కాలనాగు”తో పోలుస్తూ, ఆయనతో జాగ్రత్తగా ఉండాలని హెచ్చరించారు.
రైతుల సంక్షేమం – గతానికి ఇప్పటికి తేడా ఇదే!
రైతుల విషయంలో గత ప్రభుత్వానికి, ప్రస్తుత ప్రభుత్వానికి నక్కకు నాగలోకానికి ఉన్నంత తేడా ఉందని ముఖ్యమంత్రి స్పష్టం చేశారు. గతంలో కేసీఆర్ ప్రభుత్వం ‘వరి వేస్తే ఉరి’ అని రైతులను భయపెట్టిందని, కానీ తమ ప్రభుత్వం వరి పండించిన రైతులకు అండగా నిలుస్తోందని చెప్పారు. కేవలం ధాన్యం కొనడమే కాకుండా, సన్న బియ్యం పండించిన రైతులకు బోనస్ కూడా ఇస్తున్నామని గుర్తు చేశారు. ఇందుకోసం ప్రభుత్వం రూ. 14,560 కోట్లు ఖర్చు చేస్తోందని, పేదలందరికీ సంక్షేమ పథకాలు అందేలా చూస్తామని ధీమా వ్యక్తం చేశారు. కల్తీని నివారించడానికి హైడ్రా, పీడీ యాక్ట్ తరహాలో కఠిన చట్టాలను తీసుకువస్తామని ప్రకటించారు.
దక్షిణ భారత రాష్ట్రాలకు అన్యాయం జరగనివ్వం
నియోజకవర్గాల పునర్విభజన అంశంపై రేవంత్ రెడ్డి జాతీయ స్థాయిలో చర్చకు తెరలేపారు. కేవలం జనాభా ప్రాతిపదికన సీట్లు పెంచితే ఉత్తర భారతదేశానికే ఎక్కువ లబ్ధి చేకూరుతుందని, దీనివల్ల దక్షిణ భారతదేశానికి తీరని అన్యాయం జరుగుతుందని ఆందోళన వ్యక్తం చేశారు. ఇది కేవలం రాజకీయ పార్టీల సమస్య కాదని, దక్షిణ భారత ప్రజలందరి సమస్య అని పేర్కొన్నారు. అభివృద్ధిలో ముందున్న దక్షిణ రాష్ట్రాలను శిక్షించడం సరికాదని హితవు పలికారు. ఈ విషయంలో బీజేపీ ఎంపీ లక్ష్మణ్ వెంటనే తన పదవికి రాజీనామా చేయాలని డిమాండ్ చేశారు.
కేసీఆర్ గృహ నిర్బంధంలో ఉన్నారా?
బీఆర్ఎస్ అధినేత కేసీఆర్ ప్రస్తుతం ప్రజల్లో కనిపించకపోవడంపై రేవంత్ రెడ్డి సెటైర్లు వేశారు. కేసీఆర్ ఎక్కడా బయటకు రాకపోవడం చూస్తుంటే ఆయన గృహ నిర్బంధంలో ఉన్నారేమోనని తనకు అనిపిస్తోందని ఎద్దేవా చేశారు. రాష్ట్రంలో ప్రజా పాలన దిగ్విజయంగా సాగుతోందని, రూ. 500 గ్యాస్ సిలిండర్ వంటి పథకాలు నిరంతరాయంగా అందుతాయని స్పష్టం చేశారు. మంచి పరిపాలన అందించడమే తన లక్ష్యమని చెబుతూ, రేపటి నుంచి రెండు రోజుల పాటు తాను కేరళలో ఎన్నికల ప్రచారంలో పాల్గొంటానని రేవంత్ రెడ్డి వెల్లడించారు.