Rythu Bharosa: తెలంగాణ రాష్ట్రంలోని అన్నదాతలకు ముఖ్యమంత్రి రేవంత్ రెడ్డి అదిరిపోయే తీపి కబురు అందించారు. రైతు భరోసా నిధుల కోసం ఎంతో ఆశగా ఎదురుచూస్తున్న రైతులకు ఊరటనిస్తూ, నేడు ఈ నిధులను విడుదల చేస్తున్నట్లు ఆయన ప్రకటించారు. సిద్దిపేట జిల్లా పర్యటనలో ఉన్న ముఖ్యమంత్రి, తన సోషల్ మీడియా వేదికగా స్పందిస్తూ.. రైతు సంక్షేమం కోసం ఒక అన్నగా తాను బాధ్యత తీసుకున్నానని, సాగు మడిలో రైతు ధైర్యంగా నిలబడేలా భరోసా కల్పిస్తున్నానని ఎంతో ఆత్మీయంగా పేర్కొన్నారు.
ఈ పథకం ద్వారా రాష్ట్రవ్యాప్తంగా ఉన్న సుమారు 70 లక్షల మంది రైతులకు ప్రయోజనం చేకూరనుంది. ఇందుకోసం ప్రభుత్వం ఏకంగా 9 వేల కోట్ల రూపాయల నిధులను విడుదల చేస్తోంది. సిద్దిపేట జిల్లాలోని నర్మెట గ్రామం వేదికగా ఈ నిధుల పంపిణీ కార్యక్రమానికి శ్రీకారం చుడుతున్నట్లు సీఎం వెల్లడించారు. తమ ప్రభుత్వ పాలనలో రైతే రాజని మరోసారి నిరూపిస్తూ, అర్హులైన ప్రతి రైతు ఖాతాలోకి ఈ నగదు జమ అయ్యేలా చర్యలు తీసుకుంటున్నామని ఆయన స్పష్టం చేశారు.
కేవలం ఆర్థిక సాయంతోనే సరిపెట్టకుండా, రైతుల అభివృద్ధి కోసం పరిశ్రమల స్థాపనపై కూడా ప్రభుత్వం ప్రత్యేక దృష్టి సారించిందని సీఎం రేవంత్ రెడ్డి తెలిపారు. కేవలం 17 నెలల స్వల్ప కాలంలోనే పామ్ ఆయిల్ పరిశ్రమను పూర్తి చేసి, నేడు దానిని రైతు లోకానికి అంకితం చేస్తున్నట్లు ప్రకటించారు. దీనికి అదనంగా మరో రిఫైనరీ యూనిట్కు కూడా శంకుస్థాపన చేస్తున్నామని చెప్పారు. రైతుల ఆదాయం పెంచేలా ప్రభుత్వం తీసుకుంటున్న ఈ చర్యలు వ్యవసాయ రంగానికి కొత్త ఊపిరి పోస్తాయని ఆయన ధీమా వ్యక్తం చేశారు.
అన్నదాత సంతోషం కోసం అన్నగా బాధ్యత తీసుకున్నా. రైతును ధైర్యంగా సాగు మడిలో నిలబెట్టేందుకు భరోసా ఇస్తున్నా. 70 లక్షల మంది రైతన్నల కోసం రూ.9000 కోట్ల రైతు భరోసా నిధుల విడుదలకు నేడు శ్రీకారం చుడుతున్నాం. సిద్ధిపేట జిల్లా నర్మెట గ్రామ వేదికగా మరోసారి మా పాలనలో రైతే రాజు అని రుజువు…
— Revanth Reddy (@revanth_anumula) March 22, 2026