Crime News: జగిత్యాల జిల్లాలో చోటుచేసుకున్న ఒక దారుణ ఘటన స్థానికులను తీవ్రంగా కలచివేస్తోంది. ప్రేమించి పెళ్లి చేసుకున్న భర్తే, కట్టుకున్న భార్యను అత్యంత కిరాతకంగా అంతమొందించాడు. ఐదు నెలల గర్భవతి అని కూడా చూడకుండా, పుట్టబోయే బిడ్డతో సహా ఆమె ప్రాణాలు తీయడం అందరినీ కన్నీరు పెట్టిస్తోంది. ఈ విషాద ఘటన కోరుట్ల మండలం మాదాపూర్ గ్రామంలో వెలుగుచూసింది.
వివరాల్లోకి వెళ్తే.. మాదాపూర్ గ్రామానికి చెందిన వైష్ణవి, కోరుట్లకు చెందిన హరిబాబు గత కొంతకాలంగా ప్రేమించుకున్నారు. వీరిద్దరూ ఎనిమిది నెలల క్రితం పెద్దల సమక్షంలో ఎంతో ఘనంగా వివాహం చేసుకున్నారు. పెళ్లయిన కొత్తలో వీరి సంసారం సాఫీగానే సాగింది. కానీ, కొద్దిరోజుల తర్వాత భార్యాభర్తల మధ్య చిన్న చిన్న గొడవలు మొదలయ్యాయి. ఈ గొడవలు రోజురోజుకు పెరిగి పెద్దవయ్యాయి.
సోమవారం రాత్రి కూడా వీరిద్దరి మధ్య తీవ్రస్థాయిలో వాగ్వాదం జరిగింది. ఆ సమయంలో కోపంతో ఊగిపోయిన హరిబాబు, తన భార్య వైష్ణవిపై విచక్షణారహితంగా దాడి చేశాడు. ఈ దాడిలో ఆమె అక్కడికక్కడే ప్రాణాలు కోల్పోయింది. మంగళవారం ఉదయం కుటుంబ సభ్యులు గదిలోకి వెళ్లి చూడగా, వైష్ణవి అపస్మారక స్థితిలో పడి ఉంది. వెంటనే ఆమెను ఆస్పత్రికి తీసుకెళ్లినప్పటికీ, అప్పటికే ఆమె మరణించిందని డాక్టర్లు చెప్పారు.
వైష్ణవి ప్రస్తుతం ఐదు నెలల గర్భవతి. లోకం చూడాల్సిన చిన్న ప్రాణం కూడా తండ్రి చేతిలోనే బలవ్వడం గ్రామస్తులను దిగ్భ్రాంతికి గురిచేసింది. ఈ ఘటన తర్వాత నిందితుడు హరిబాబు అక్కడి నుంచి పారిపోయాడు. మృతురాలి కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. నిందితుడిని పట్టుకోవడానికి ప్రత్యేక బృందాలతో గాలింపు చర్యలు చేపట్టారు.