Mahesh Kumar Goud: తెలంగాణలో డ్రగ్స్ వ్యవహారం రాజకీయంగా పెను దుమారం రేపుతోంది. మంగళవారం గాంధీ భవన్లో జరిగిన మీడియా సమావేశంలో తెలంగాణ పీసీసీ అధ్యక్షుడు మహేష్ కుమార్ గౌడ్ మాట్లాడుతూ.. డ్రగ్స్ నిర్మూలనపై రాష్ట్ర ప్రభుత్వం కఠినంగా ఉందని స్పష్టం చేశారు. ముఖ్యమంత్రి రేవంత్ రెడ్డి స్వయంగా డ్రగ్ టెస్ట్కు సిద్ధంగా ఉన్నారని, ఇదే ధైర్యం ఉంటే బీఆర్ఎస్ అధినేత కేసీఆర్ కూడా ముందుకు రావాలని ఆయన సవాల్ విసిరారు. రాష్ట్రంలోని ప్రజాప్రతినిధులందరూ ఈ పరీక్షలకు సహకరించాలని ఆయన పిలుపునిచ్చారు.
గత ప్రభుత్వంపై తీవ్ర ఆరోపణలు
గత పదేళ్ల బీఆర్ఎస్ పాలనలో డ్రగ్స్ సంస్కృతి విచ్చలవిడిగా పెరిగిపోయిందని మహేష్ గౌడ్ మండిపడ్డారు. “గత ప్రభుత్వ హయాంలో కొకైన్ వంటి భయంకరమైన డ్రగ్స్ బిస్కెట్లలా దొరికేవి. డ్రగ్స్ వ్యాపారం ద్వారా కొందరు వేల కోట్లు సంపాదించారు. డ్రగ్స్ అన్న పేరు వినగానే మీ నాయకుల పేర్లే ఎందుకు వస్తున్నాయి?” అని ఆయన ప్రశ్నించారు. మాదకద్రవ్యాల వల్ల సామాన్య ప్రజలు తమ పిల్లలను కాపాడుకోలేక అల్లాడిపోతున్నారని ఆవేదన వ్యక్తం చేశారు.
పైలట్ రోహిత్ రెడ్డి ఉదంతంపై ప్రశ్నలు
మొయినాబాద్ డ్రగ్స్ కేసులో అరెస్ట్ అయిన మాజీ ఎమ్మెల్యే పైలట్ రోహిత్ రెడ్డిపై బీఆర్ఎస్ పార్టీ ఎందుకు చర్యలు తీసుకోవడం లేదని మహేష్ గౌడ్ నిలదీశారు. నిందితులకు మద్దతుగా నిలవడం ద్వారా బీఆర్ఎస్ ప్రజలకు ఎలాంటి సందేశం ఇస్తోందని ఆయన అడిగారు. చట్టం ముందు అందరూ సమానమేనని, ఎంతటి పెద్ద వారు ఉన్నా సరే వదిలే ప్రసక్తే లేదని, కచ్చితంగా చర్యలు ఉంటాయని హెచ్చరించారు.
డ్రగ్స్ రహిత తెలంగాణే లక్ష్యం
రాష్ట్రంలో డ్రగ్స్ మహమ్మారిని వేళ్లతో సహా పెకిలించి వేయడమే కాంగ్రెస్ ప్రభుత్వ లక్ష్యమని పీసీసీ చీఫ్ తెలిపారు. రాజకీయాలకు అతీతంగా అందరూ కలిసి రావాలని, యువత భవిష్యత్తును కాపాడుకోవాల్సిన బాధ్యత అందరిపై ఉందని అన్నారు. ప్రస్తుతం జరుగుతున్న విచారణలో మరిన్ని సంచలన విషయాలు బయటకు వస్తాయని ఆయన ధీమా వ్యక్తం చేశారు.