Oscar Awards 2026: ప్రపంచ సినిమా రంగంలో అత్యంత ప్రతిష్టాత్మకమైన 98వ ఆస్కార్ అవార్డుల (Oscars 2026) ప్రధానోత్సవ వేడుక అమెరికాలోని లాస్ ఏంజెలెస్లో గల డాల్బీ థియేటర్లో అత్యంత వైభవంగా జరిగింది. హాలీవుడ్ ప్రముఖ కమెడియన్ కోనన్ ఓబ్రియన్ వ్యాఖ్యాతగా వ్యవహరించిన ఈ వేడుకలో ప్రపంచవ్యాప్తంగా ఉన్న సినీ దిగ్గజాలు పాల్గొన్నారు. భారతీయ నటి ప్రియాంక చోప్రా ఈ వేడుకలో అవార్డు ప్రెజెంటర్గా మెరిసి అందరి దృష్టిని ఆకర్షించారు.
‘వన్ బ్యాటిల్ ఆఫ్టర్ అనదర్’ హవా
ఈ ఏడాది ఆస్కార్ రేసులో ‘వన్ బ్యాటిల్ ఆఫ్టర్ అనదర్’ చిత్రం ప్రభంజనం సృష్టించింది. ఈ సినిమా ఏకంగా ఉత్తమ చిత్రం, ఉత్తమ దర్శకుడు (పాల్ థామస్ అండర్సన్) సహా పలు కీలక విభాగాల్లో అవార్డులను కొల్లగొట్టింది. యుద్ధ నేపథ్యంలో సాగే ఈ చిత్రం విమర్శకుల ప్రశంసలు అందుకోవడమే కాకుండా, అకాడమీ ఓటర్లను కూడా విశేషంగా ఆకట్టుకుంది.
ఉత్తమ నటీనటులు వీరే..
నటన విభాగంలో మైఖేల్ బి జోర్డాన్ ‘సిన్నర్స్’ చిత్రానికి గానూ ఉత్తమ నటుడిగా నిలిచారు. అలాగే ‘హామ్నెట్’ చిత్రంలో అద్భుత ప్రదర్శన కనబరిచిన జెస్సీ బక్లీ ఉత్తమ నటిగా ఆస్కార్ అందుకున్నారు. సహాయ నటుడిగా సీన్ పెన్ (వన్ బ్యాటిల్ ఆఫ్టర్ అనదర్), సహాయ నటిగా ఎమీ మాడిగన్ (వెపన్స్) విజేతలుగా నిలిచారు.
ప్రధాన విభాగాల్లో విజేతల జాబితా:
ఈ ఏడాది వివిధ విభాగాల్లో ఆస్కార్ అందుకున్న చిత్రాలు/వ్యక్తులు:
-
ఉత్తమ చిత్రం: వన్ బ్యాటిల్ ఆఫ్టర్ అనదర్
-
ఉత్తమ దర్శకుడు: పాల్ థామస్ అండర్సన్
-
ఉత్తమ నటుడు: మైఖేల్ బి జోర్డాన్ (సిన్నర్స్)
-
ఉత్తమ నటి: జెస్సీ బక్లీ (హామ్నెట్)
-
ఉత్తమ విజువల్ ఎఫెక్ట్స్: అవతార్: ఫైర్ అండ్ యాష్
-
ఉత్తమ ఒరిజినల్ సాంగ్: ‘గోల్డెన్’ (కెపాప్ డిమాన్ హంటర్స్)
-
ఉత్తమ ఇంటర్నేషనల్ ఫీచర్ ఫిల్మ్: సెంటిమెంటల్ వ్యాల్యూ (నార్వే)
సాంకేతిక విభాగాల్లో పోటీ
టెక్నికల్ విభాగాల్లో ‘ఫ్రాంకెన్స్టైయిన్’ చిత్రం తన సత్తా చాటింది. బెస్ట్ కాస్ట్యూమ్ డిజైన్, మేకప్, ప్రొడక్షన్ డిజైన్ వంటి విభాగాల్లో ఈ సినిమాకు అవార్డులు దక్కాయి. అటు ‘సిన్నర్స్’ చిత్రం ఒరిజినల్ స్కోర్, సినిమాటోగ్రఫీ విభాగాల్లో అవార్డులను సొంతం చేసుకుంది. ప్రముఖ యానిమేషన్ చిత్రం ‘కెపాప్ డిమాన్ హంటర్స్’ ఉత్తమ యానిమేటెడ్ ఫీచర్ ఫిల్మ్గా నిలిచింది.
మొత్తానికి 98వ ఆస్కార్ వేడుకలు కొత్త రికార్డులకు, మరికొన్ని సర్ప్రైజ్లకు వేదికగా నిలిచాయి. ప్రియాంక చోప్రా వేదికపైకి వచ్చి అవార్డును అందించడం భారతీయులకు గర్వకారణంగా నిలిచింది.