Local Body Elections: ఆంధ్రప్రదేశ్లో రాజకీయ సందడి మళ్లీ మొదలుకాబోతోంది. వచ్చే ఆరు నెలల్లోపు స్థానిక సంస్థల ఎన్నికలు నిర్వహించేందుకు ప్రభుత్వం సిద్ధమవుతోంది. ఈ మేరకు ముఖ్యమంత్రి నారా చంద్రబాబు నాయుడు తన మంత్రివర్గానికి దిశానిర్దేశం చేశారు. నిన్న అమరావతిలో జరిగిన కేబినెట్ సమావేశంలో ఆయన మాట్లాడుతూ.. ఇప్పటి నుంచే ఎన్నికలకు సమాయత్తం కావాలని మంత్రులను ఆదేశించారు.
ప్రజల్లోకి వెళ్లండి.. అభివృద్ధిని వివరించండి
ప్రభుత్వం అధికారంలోకి వచ్చినప్పటి నుంచి అనేక అభివృద్ధి పనులను చేపట్టినప్పటికీ, వాటిని ప్రజల్లోకి బలంగా తీసుకెళ్లడంలో కొంత వెనుకబడ్డామని ముఖ్యమంత్రి అభిప్రాయపడ్డారు. మంత్రులు కేవలం సచివాలయాలకే పరిమితం కాకుండా, క్షేత్రస్థాయిలో పర్యటనలు పెంచాలని ఆయన సూచించారు. ప్రభుత్వం చేస్తున్న మేలును, చేపట్టిన సంక్షేమ పథకాలను ప్రజలకు క్షుణ్ణంగా వివరించాలని స్పష్టం చేశారు.
శాఖలపై పట్టు.. గెలుపే లక్ష్యం
స్థానిక సంస్థల ఎన్నికలు పార్టీకి ప్రతిష్టాత్మకం కావడంతో, మంత్రులు తమ తమ శాఖలపై పూర్తి పట్టు సాధించాలని సీఎం ఆదేశించారు. ప్రతి శాఖ ద్వారా ప్రజలకు అందుతున్న సేవలను పర్యవేక్షిస్తూనే, మరోవైపు ఎన్నికల ప్రణాళికలను సిద్ధం చేసుకోవాలని సూచించారు. ప్రజలతో నిరంతరం మమేకమైతేనే ఎన్నికల్లో ఆశించిన ఫలితాలు సాధించగలమని ఆయన నొక్కి చెప్పారు.
ముందస్తు వ్యూహం
వచ్చే ఆరు నెలల కాలాన్ని అత్యంత కీలకంగా భావించాలని, అభివృద్ధి మరియు సంక్షేమ కార్యక్రమాల అమలులో వేగం పెంచాలని ప్రభుత్వం భావిస్తోంది. గ్రామ, వార్డు స్థాయిల్లో పార్టీని బలోపేతం చేస్తూనే, ప్రభుత్వ పాలనపై ప్రజల్లో నమ్మకాన్ని పెంచేలా మంత్రులు పని చేయాలని ముఖ్యమంత్రి స్పష్టమైన ఆదేశాలు జారీ చేశారు.