KTR: ఢిల్లీ మద్యం కేసు కారణంగా గత అసెంబ్లీ, పార్లమెంటు ఎన్నికల్లో బీఆర్ఎస్ పార్టీ రాజకీయంగా తీవ్రంగా నష్టపోయిందని ఆ పార్టీ కార్యనిర్వాహక అధ్యక్షుడు కేటీఆర్ అభిప్రాయపడ్డారు. ఈ కేసు కేవలం రాజకీయ కక్షతో అల్లిన కుట్ర అని, దీని వల్ల పార్టీ ప్రతిష్టను దెబ్బతీసే ప్రయత్నం జరిగిందని ఆయన ఆవేదన వ్యక్తం చేశారు. ఎమ్మెల్సీ కవితకు కోర్టులో న్యాయం జరగడం పట్ల స్పందిస్తూ, త్వరలోనే తమ పార్టీ నేతలపై ఉన్న మిగతా అబద్ధపు కేసులు కూడా వీగిపోతాయని ఆయన ధీమా వ్యక్తం చేశారు.
మద్యం కుంభకోణం అనే పేరుతో ఢిల్లీలోని కేజ్రీవాల్ ప్రభుత్వాన్ని ఇబ్బందులకు గురిచేయడమే కాకుండా, తెలంగాణలో బీఆర్ఎస్ ను బలహీనపరచడానికి ప్రత్యర్థి పార్టీలు దీనిని ఒక అస్త్రంగా వాడుకున్నాయని కేటీఆర్ విమర్శించారు. కాంగ్రెస్, బీజేపీలు బాధ్యతారహితంగా చేసిన ఆరోపణల వల్ల ప్రజలు తప్పుదోవ పట్టారని ఆయన పేర్కొన్నారు. నిజం నిలకడ మీద తెలుస్తుందని, కానీ ఈ లోపు జరిగిన ప్రచారం వల్ల పార్టీకి కోలుకోలేని రాజకీయ నష్టం జరిగిందని ఆయన వివరించారు.
నేటి రాజకీయాల్లో సాక్ష్యాల కంటే ఆరోపణలకే ఎక్కువ ప్రాధాన్యత ఇస్తున్నారని, న్యాయ ప్రక్రియ కంటే మీడియాలో వచ్చే కథనాలే ప్రజల అభిప్రాయాలను ప్రభావితం చేస్తున్నాయని కేటీఆర్ ఆందోళన వ్యక్తం చేశారు. ప్రత్యర్థులను అణచివేయడమే లక్ష్యంగా కేంద్ర ప్రభుత్వం ఇలాంటి కుట్రలకు పాల్పడుతోందని విమర్శించారు. అయితే, అంతిమంగా న్యాయమే గెలుస్తుందని, కవితపై వచ్చిన ఆరోపణలు అవాస్తవమని కోర్టు తీర్పుల ద్వారా స్పష్టమవుతోందని ఆయన స్పష్టం చేశారు.
మరోవైపు బీఆర్ఎస్ సీనియర్ నేత వినోద్ కుమార్ కూడా ఈ అంశంపై స్పందిస్తూ, తమ పార్టీ అధినేత కేసీఆర్ ముందుగా చెప్పినట్లుగానే కవిత ఈ కేసు నుండి ‘కడిగిన ముత్యంలా’ బయటకు వస్తున్నారని హర్షం వ్యక్తం చేశారు. కేజ్రీవాల్, మనీష్ సిసోడియా వంటి నాయకులపై పెట్టిన కేసులు కూడా రాజకీయ ప్రేరేపితమైనవేనని ఆయన అన్నారు. రాజకీయ ప్రయోజనాల కోసం దర్యాప్తు సంస్థలను వాడుకోవడం ప్రజాస్వామ్యానికి మంచిది కాదని ఆయన హితవు పలికారు.