Rain Alert: బంగాళాఖాతంలో ఏర్పడిన అల్పపీడనం కారణంగా తెలుగు రాష్ట్రాల్లో వాతావరణం ఒక్కసారిగా మారిపోయింది. దీని ప్రభావంతో రానున్న రెండు రోజుల పాటు ఆంధ్రప్రదేశ్, తెలంగాణ రాష్ట్రాల్లో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ముఖ్యంగా ఈదురుగాలులు, ఉరుములు మరియు మెరుపులతో కూడిన వానలు పడే అవకాశం ఉండటంతో ప్రజలు అప్రమత్తంగా ఉండాలని అధికారులు సూచిస్తున్నారు.
తెలంగాణలో పరిస్థితి:
తెలంగాణలోని పలు జిల్లాల్లో ఇప్పటికే అకాల వర్షాలు బీభత్సం సృష్టిస్తున్నాయి. హైదరాబాద్ నగరంలో నిన్న రాత్రంతా భారీ వర్షం కురవగా, రాష్ట్రంలోని మరికొన్ని జిల్లాల్లో ఈదురుగాలుల ధాటికి చెట్లు విరిగిపడ్డాయి. రాబోయే కొన్ని గంటల్లో గద్వాల్, మహబూబ్నగర్, నాగర్ కర్నూల్, నల్గొండ, రంగారెడ్డి, సూర్యాపేట, వనపర్తి జిల్లాల్లో వానలు పడే ఛాన్స్ ఉంది. నిర్మల్, జగిత్యాల వంటి జిల్లాల్లో గాలివాన వల్ల మామిడి, మొక్కజొన్న పంటలు దెబ్బతినడంతో రైతులు ఆందోళన చెందుతున్నారు.
ఆంధ్రప్రదేశ్కు హెచ్చరిక:
అటు ఆంధ్రప్రదేశ్లోనూ అల్పపీడన ప్రభావం స్పష్టంగా కనిపిస్తోంది. పశ్చిమ బెంగాల్ నుంచి ఉత్తర కోస్తా వరకు విస్తరించి ఉన్న ద్రోణి కారణంగా ఇవాళ, రేపు రాష్ట్రంలోని పలు ప్రాంతాల్లో తేలికపాటి నుండి మోస్తరు వర్షాలు కురిసే అవకాశం ఉంది. కొన్ని చోట్ల పిడుగులు పడే ప్రమాదం ఉందని అమరావతి వాతావరణ కేంద్రం హెచ్చరించింది. పొలాల్లో పనిచేసే వారు, గొర్రెల కాపరులు చెట్ల కింద ఉండవద్దని, సురక్షిత ప్రాంతాల్లో ఉండాలని సూచించారు.