MLA KVR: కామారెడ్డి జిల్లా కేంద్రంలోని ప్రభుత్వ డిగ్రీ కళాశాల భూముల వ్యవహారంపై రాజకీయ యుద్ధం ముదిరింది. తనపై వస్తున్న అవినీతి ఆరోపణలను నిరూపిస్తే తక్షణమే ఎమ్మెల్యే పదవికి రాజీనామా చేస్తానని బీజేపీ ఎమ్మెల్యే కాటిపల్లి వెంకటరమణారెడ్డి కాంగ్రెస్ సీనియర్ నేత షబ్బీర్ అలీకి సవాల్ విసిరారు. ఈ వివాదానికి సంబంధించి వాస్తవాలను వెలికితీయాలని కోరుతూ ఆయన సోమవారం కామారెడ్డి జిల్లా కలెక్టర్ను కలిసి వినతిపత్రం సమర్పించారు.
నిజాలు బయటపెట్టాలని కలెక్టర్కు వినతి
డిగ్రీ కళాశాల భూములకు సంబంధించిన పూర్తి వివరాలను బహిర్గతం చేయాలని ఎమ్మెల్యే డిమాండ్ చేశారు. కాలేజీ భూములను ప్రైవేట్ వ్యక్తులకు కట్టబెట్టారన్న ఆరోపణల్లో వాస్తవం లేదని ఆయన స్పష్టం చేశారు.
ఈ భూముల వ్యవహారంపై ప్రభుత్వం వద్ద ఉన్న రికార్డులను ఇవ్వాలని ఇప్పటికే ఆర్టీఐ (RTI) ద్వారా కోరినట్లు వెల్లడించారు.
డిగ్రీ కళాశాల భూముల విషయంలో నేను ఒక్క గజం భూమినైనా ఆక్రమించినట్లు లేదా అవినీతికి పాల్పడినట్లు నిరూపిస్తే ఎమ్మెల్యే పదవిని వదులుకుంటాను అని ఆయన ప్రకటించారు. కాంగ్రెస్ పార్టీ కేవలం రాజకీయ లబ్ధి కోసమే సత్యదూరమైన ప్రచారాలు చేస్తోందని మండిపడ్డారు.
పోలీసుల తీరుపై ఆగ్రహం
కామారెడ్డిలో నెలకొన్న ఉద్రిక్త పరిస్థితుల నేపథ్యంలో పోలీసుల వ్యవహారశైలిపై ఎమ్మెల్యే అసహనం వ్యక్తం చేశారు.
తనను కలవడానికి వస్తున్న బీజేపీ రాష్ట్ర నాయకులను పోలీసులు అక్రమంగా అడ్డుకుంటున్నారని, అదే సమయంలో కాంగ్రెస్ నాయకులను ఎందుకు వదిలేస్తున్నారని ఆయన ప్రశ్నించారు.
నియోజకవర్గంలో శాంతి భద్రతలకు విఘాతం కలగకూడదనే ఉద్దేశంతోనే తాను సహనంతో ఉన్నానని, కానీ ప్రభుత్వం తనపై కక్షసాధింపు చర్యలకు దిగుతోందని ఆరోపించారు.
కామారెడ్డి భూ వివాదం ఇప్పుడు రాష్ట్రస్థాయిలో చర్చనీయాంశంగా మారింది. ఎమ్మెల్యే కలెక్టర్ను కలవడంతో ఈ వ్యవహారంపై అధికార యంత్రాంగం ఏ విధంగా స్పందిస్తుందనేది ఆసక్తికరంగా మారింది. త్వరలోనే ఈ భూముల చిక్కుముడి విడిపోతుందని, ఎవరు దోషో ప్రజలకు తెలుస్తుందని కాటిపల్లి ధీమా వ్యక్తం చేశారు.