TTD EO: టీటీడీ నూతన కార్యనిర్వహణాధికారి (EO)గా సీనియర్ ఐఏఎస్ అధికారి ముద్దాడ రవిచంద్ర శుక్రవారం బాధ్యతలు స్వీకరించారు. తిరుమల శ్రీవారి ఆలయంలోని రంగనాయకుల మండపంలో శాస్త్రోక్తంగా ఆయన ఈ బాధ్యతలను చేపట్టారు. అనంతరం ఆయన తన కుటుంబ సమేతంగా స్వామివారిని దర్శించుకుని మొక్కులు తీర్చుకున్నారు.
ముద్దాడ రవిచంద్ర 1996 బ్యాచ్కు చెందిన ఐఏఎస్ అధికారి. ఆయన ప్రస్తుతం ముఖ్యమంత్రి కార్యాలయంలో ప్రత్యేక ప్రధాన కార్యదర్శిగా బాధ్యతలు నిర్వహిస్తున్నారు. తిరుమల లడ్డూ నెయ్యి కల్తీ వివాదం నేపథ్యంలో, ప్రభుత్వం అనిల్ కుమార్ సింఘాల్ను బదిలీ చేసి, రవిచంద్రకు ఈ అదనపు బాధ్యతలను అప్పగించింది. శుక్రవారం ఉదయం 10:08 గంటలకు ఆయన బాధ్యతలు స్వీకరించారు.
దర్శనం మరియు ఆశీర్వచనం: బాధ్యతలు చేపట్టిన అనంతరం రవిచంద్ర దంపతులు శ్రీ భూవరాహ స్వామిని, ఆ తర్వాత శ్రీ వేంకటేశ్వర స్వామిని దర్శించుకున్నారు. ఆలయ పండితులు వారికి వేద ఆశీర్వచనం అందజేయగా, టీటీడీ అదనపు ఈవో వెంకయ్యచౌదరి స్వామివారి తీర్థప్రసాదాలను, చిత్రపటాన్ని అందజేశారు. తిరుమల పవిత్రతను కాపాడటం మరియు భక్తులకు మెరుగైన సేవలు అందించడమే తన ప్రథమ ప్రాధాన్యత అని ఈ సందర్భంగా ఆయన పేర్కొన్నారు.