Vizag: విశాఖపట్నం రైల్వే స్టేషన్లో పోలీసులు భారీ ఎత్తున నకిలీ కరెన్సీ నోట్లను పట్టుకున్నారు. సాధారణంగా జరిగే తనిఖీల్లో భాగంగా రైల్వే ప్రొటెక్షన్ పోలీసులు సోదాలు చేస్తుండగా ఈ విషయం వెలుగులోకి వచ్చింది. పక్కా సమాచారంతో రంగంలోకి దిగిన ఇన్స్పెక్టర్ ధనంజయ నాయుడు బృందం, అనుమానాస్పదంగా కనిపిస్తున్న ఇద్దరు యువకులను ఆపి తనిఖీ చేయగా వారి వద్ద కట్టల కొద్దీ నకిలీ నోట్లు బయటపడ్డాయి.
పోలీసుల విచారణలో పట్టుబడిన వారు కడప జిల్లా ప్రొద్దుటూరుకు చెందిన సునీల్, ప్రకాశం జిల్లా మార్కాపురానికి చెందిన నితీష్ కుమార్గా గుర్తించారు. వీరిద్దరూ కలిసి ఎవరికీ అనుమానం రాకుండా రూ. 200 నోట్లను చెలామణి చేసేందుకు ప్రయత్నిస్తున్నట్లు తెలిసింది. వారి వద్ద నుండి మొత్తం రూ. 3,32,200 విలువైన నకిలీ నోట్లను స్వాధీనం చేసుకున్న పోలీసులు, నిందితులను అదుపులోకి తీసుకుని కేసు నమోదు చేశారు.
సాధారణంగా ప్రజలు పెద్ద నోట్ల విషయంలో జాగ్రత్తగా ఉంటారు కానీ, రూ. 200 నోట్లపై అంతగా దృష్టి పెట్టరనే ఉద్దేశంతోనే వీరు ఈ మోసానికి పాల్పడినట్లు సమాచారం. ఈ ముఠా వెనుక ఇంకా ఎవరైనా ఉన్నారా? ఈ నోట్లు ఎక్కడ తయారయ్యాయి? అనే కోణంలో పోలీసులు లోతుగా విచారణ జరుపుతున్నారు. ప్రయాణికులు మరియు వ్యాపారులు డబ్బులు తీసుకునే సమయంలో జాగ్రత్తగా ఉండాలని పోలీసులు సూచిస్తున్నారు.