Google: తెలంగాణ ప్రభుత్వంతో భాగస్వామ్యానికి గూగుల్ ఆసక్తి వ్యక్తం చేసింది. ఈ నేపథ్యంలో గూగుల్ ఏపీఏసీ (ఆసియా–పసిఫిక్) ప్రెసిడెంట్ రాష్ట్ర ముఖ్యమంత్రి రేవంత్ రెడ్డితో భేటీ అయ్యారు. ఈ సమావేశంలో తెలంగాణలో డిజిటల్ పాలన, సాంకేతిక అభివృద్ధి, ప్రజా సేవల నాణ్యత పెంపు అంశాలపై విస్తృతంగా చర్చించారు. తెలంగాణను టెక్నాలజీ ఆధారిత పాలనలో ముందంజలో నిలిపేందుకు గూగుల్తో కలిసి పనిచేయాలన్న ప్రభుత్వ లక్ష్యాన్ని సీఎం వివరించారు.
ప్రధానంగా ట్రాఫిక్ నియంత్రణ రంగంలో గూగుల్ టెక్నాలజీ వినియోగంపై చర్చ జరిగింది. గూగుల్ మ్యాప్స్, రియల్టైమ్ ట్రాఫిక్ డేటా, ఏఐ ఆధారిత విశ్లేషణల ద్వారా నగరాల్లో ట్రాఫిక్ రద్దీ తగ్గించడం, ప్రయాణ సమయం తగ్గించడం, రోడ్డు ప్రమాదాల నివారణ సాధ్యమవుతుందని గూగుల్ ప్రతినిధులు తెలిపారు. ముఖ్యంగా హైదరాబాద్ వంటి మహానగరాల్లో స్మార్ట్ ట్రాఫిక్ మేనేజ్మెంట్కు ఇది ఎంతగానో ఉపయోగపడుతుందని అభిప్రాయపడ్డారు.
అలాగే సైబర్ సెక్యూరిటీ రంగంలోనూ తెలంగాణ ప్రభుత్వంతో కలిసి పనిచేయడానికి గూగుల్ సిద్ధంగా ఉందని వెల్లడించింది. ప్రభుత్వ డేటా భద్రత, సైబర్ దాడులను ముందుగానే గుర్తించే వ్యవస్థలు, అధికారులకు సైబర్ భద్రతపై శిక్షణ వంటి అంశాల్లో సహకారం అందించనున్నట్లు పేర్కొంది. ఈ భాగస్వామ్యం ద్వారా తెలంగాణను డిజిటల్ గవర్నెన్స్, సాంకేతిక నవోత్తేజానికి కేంద్రంగా మరింత అభివృద్ధి చేయాలన్న దిశగా ప్రభుత్వం అడుగులు వేస్తోంది.