WPL 2026: మహిళల ప్రీమియర్ లీగ్ 2026లో భారత దిగ్గజ క్రికెటర్, ముంబై ఇండియన్స్ కెప్టెన్ హర్మన్ప్రీత్ కౌర్ సరికొత్త చరిత్ర సృష్టించారు. మంగళవారం (జనవరి 13) గుజరాత్ జెయింట్స్తో జరిగిన ఉత్కంఠభరిత పోరులో అద్భుత ప్రదర్శన చేసిన ఆమె, డబ్ల్యూపీఎల్ చరిత్రలో 10 అర్ధ సెంచరీలు (50s) సాధించిన ప్రపంచంలోనే తొలి క్రికెటర్గా రికార్డు పుటల్లోకి ఎక్కారు. 193 పరుగుల భారీ లక్ష్య ఛేదనలో హర్మన్ప్రీత్ కేవలం 43 బంతుల్లో 7 ఫోర్లు, 2 సిక్సర్లతో 71 పరుగులు చేసి, ముంబై ఇండియన్స్కు 7 వికెట్ల తేడాతో ఘనవిజయాన్ని అందించారు.
36 ఏళ్ల హర్మన్ప్రీత్ ఈ మ్యాచ్లో 33 బంతుల్లోనే తన హాఫ్ సెంచరీని పూర్తి చేసుకున్నారు. ఇప్పటివరకు 30 డబ్ల్యూపీఎల్ మ్యాచ్లు ఆడిన ఆమె, 10 అర్ధ సెంచరీలతో అగ్రస్థానంలో కొనసాగుతున్నారు. ఆమె సహచర క్రీడాకారిణి నాట్ సివర్ బ్రంట్, యూపీ వారియర్స్ కెప్టెన్ మెగ్ లానింగ్ చెరో 9 ఫిఫ్టీలతో రెండో స్థానంలో ఉన్నారు. గత శనివారం ఢిల్లీ క్యాపిటల్స్తో జరిగిన మ్యాచ్లోనూ ఆమె 74 పరుగులతో అజేయంగా నిలిచి తన ఫామ్ను చాటుకున్నారు.
ఇది కూడా చదవండి: Bhogi: భోగి పళ్ళు ఎందుకు పోస్తారు?
ఈ అద్భుత ఇన్నింగ్స్ ద్వారా హర్మన్ప్రీత్ మరో అరుదైన మైలురాయిని కూడా అందుకున్నారు. డబ్ల్యూపీఎల్ చరిత్రలో 1000 పరుగులు పూర్తి చేసిన తొలి భారతీయ బ్యాటర్గా, ఓవరాల్గా రెండో క్రీడాకారిణిగా నిలిచారు. గుజరాత్ జెయింట్స్పై ఇన్నింగ్స్ 18వ ఓవర్లో రాజేశ్వరి గైక్వాడ్ బౌలింగ్లో ఫోర్ బాదడం ద్వారా ఆమె ఈ క్లబ్లో చేరారు. హర్మన్ప్రీత్ కంటే ముందు నాట్ సివర్ బ్రంట్ మాత్రమే ఈ ఘనత సాధించారు.
అంతేకాకుండా, లీగ్ చరిత్రలో 1000 పరుగులు పూర్తి చేసిన తొలి కెప్టెన్ కూడా హర్మన్ప్రీత్ కౌర్ కావడం విశేషం. మెగ్ లానింగ్ (996 పరుగులు) ఈ జాబితాలో ఆమె తరువాతి స్థానంలో ఉన్నారు. వేలంలో ముంబై ఇండియన్స్ 2.50 కోట్ల రూపాయల భారీ ధరకు ఆమెను రిటైన్ చేసుకోవడం సరైన నిర్ణయమని హర్మన్ తన ఆట తీరుతో మరోసారి నిరూపించారు. ముంబై ఇండియన్స్ జట్టు చరిత్రలోనే ఇది అత్యధిక స్కోరు ఛేదన కావడం గమనార్హం.