Mana Shankara Vara Prasad Garu Review: సంక్రాంతి పండుగ అంటేనే థియేటర్ల దగ్గర సందడి. అందులోనూ మెగాస్టార్ చిరంజీవి సినిమా వస్తోందంటే ఆ హంగామా మామూలుగా ఉండదు. అపజయమే లేని దర్శకుడు అనిల్ రావిపూడి, కామెడీకి కేరాఫ్ అడ్రస్ అయిన చిరంజీవి కలిసి సినిమా చేస్తున్నారని అనౌన్స్ చేసినప్పటి నుంచే అందరిలోనూ భారీ అంచనాలు ఉన్నాయి. దీనికి తోడు విక్టరీ వెంకటేష్ కూడా ఈ సినిమాలో కీలక పాత్ర పోషించడంతో ఈ క్రేజ్ రెట్టింపు అయింది. జనవరి 12న విడుదల కావాల్సిన ఈ సినిమా, ఒకరోజు ముందుగానే ప్రీమియర్ షోలతో ప్రేక్షకుల ముందుకు వచ్చింది. మరి ఈ సినిమాతో చిరంజీవి మరో హిట్టు కొట్టాడా? అనేది ఇప్పుడు చూద్దాం.
కథ ఏంటంటే.. సినిమాలో శంకర వరప్రసాద్ (చిరంజీవి) నేషనల్ ఇన్వెస్టిగేషన్ ఏజెన్సీలో పనిచేసే ఒక పవర్ఫుల్ ఆఫీసర్. వృత్తిరీత్యా ఎంతో కఠినంగా ఉండే ఆయన, వ్యక్తిగత జీవితంలో మాత్రం ఒంటరివాడు. దేశంలోని ధనవంతురాలైన శశిరేఖ (నయనతార)ను ప్రేమించి పెళ్లి చేసుకున్నప్పటికీ, కొన్ని కారణాల వల్ల ఇద్దరూ విడాకులు తీసుకుంటారు. తన భార్యను, పిల్లలను ప్రాణంగా ప్రేమించే ప్రసాద్, వారికి మళ్ళీ ఎలా దగ్గరయ్యాడు? శశిరేఖ తండ్రి మీద జరిగిన దాడికి, ఈ కుటుంబానికి ఉన్న సంబంధం ఏంటి? చివరకు భార్యాపిల్లల మనసు గెలుచుకుని శంకర వరప్రసాద్ గారు ఎలా విజయం సాధించారు? అనేదే ఈ సినిమా కథ.
మెగాస్టార్ కామెడీ టైమింగ్ – దర్శకుడి పనితీరు: దర్శకుడు అనిల్ రావిపూడి ఎప్పుడూ ఫ్యామిలీ ఆడియన్స్నే నమ్ముకుంటారు. ఈసారి కూడా అదే ఫార్ములాను వాడారు. ఒకప్పుడు ‘చంటబ్బాయ్’, ‘శంకర్ దాదా’ సినిమాల్లో చిరంజీవి ఎంత సరదాగా ఉండేవారో, మళ్ళీ అలాంటి వింటేజ్ చిరంజీవిని ఈ సినిమాలో చూపించారు. పెద్దగా బరువున్న కథ కాకపోయినా, చిరంజీవి మార్కు కామెడీతో సినిమా ఎక్కడా బోర్ కొట్టకుండా సాగిపోతుంది. ముఖ్యంగా భార్యాభర్తల మధ్య వచ్చే గొడవలు, విడాకుల తర్వాత కలిగే ఇబ్బందులను చాలా హృద్యంగా చూపించారు. ఈ రోజుల్లో చిన్న చిన్న కారణాలకే విడిపోతున్న జంటలకు ఈ సినిమా ఒక మంచి సందేశాన్ని ఇస్తుంది.
ఎవరెలా నటించారంటే? మెగాస్టార్ చిరంజీవి తన నటనతో సినిమాను మొత్తం భుజాల మీద మోశారు. ఆయన మేనరిజమ్స్, డైలాగ్ డెలివరీ అభిమానులకు పండగే అని చెప్పాలి. ఇక నయనతార చాలా హుందాగా నటించి తన పాత్రకు న్యాయం చేసింది. విక్టరీ వెంకటేష్ అతిథి పాత్రలో మెరిసినా, ఆ కొద్దిసేపు థియేటర్లలో నవ్వులు పూయించారు. హర్ష, అభినవ్ గోమఠం వంటి యువ నటులు కామెడీలో తమవంతు సాయం అందించారు. భీమ్స్ అందించిన సంగీతం, ముఖ్యంగా బ్యాక్ గ్రౌండ్ స్కోర్ సినిమాకు ప్రాణం పోశాయి.
ముగింపు: మొత్తానికి ‘మన శంకర వరప్రసాద్ గారు’ సినిమా కేవలం అభిమానులకే కాకుండా, ఫ్యామిలీ అందరూ కలిసి చూసేలా ఉంది. సందేశంతో పాటు కావాల్సినంత వినోదాన్ని పంచడంలో దర్శకుడు సక్సెస్ అయ్యాడు. ఈ సంక్రాంతికి మెగాస్టార్ ఖాతాలో మరో ఘనవిజయం చేరినట్టే అనిపిస్తోంది.