PSLV-C62: భారత అంతరిక్ష పరిశోధనా సంస్థ (ఇస్రో) 2026 కొత్త ఏడాదిలో తన తొలి భారీ ప్రయోగానికి సర్వం సిద్ధం చేసింది. పీఎస్ఎల్వీ-సి62 రాకెట్ ప్రయోగం కోసం ఆదివారం మధ్యాహ్నం 12:48 గంటలకు 22.5 గంటల కౌంట్డౌన్ను శాస్త్రవేత్తలు ప్రారంభించారు. శ్రీహరికోటలోని షార్ కేంద్రం నుంచి సోమవారం ఉదయం 10:18 గంటలకు ఈ రాకెట్ నింగిలోకి దూసుకెళ్లనుంది. భూ పరిశీలన ఉపగ్రహంతో పాటు మొత్తం 14 ఉపగ్రహాలను ఇది కక్ష్యలోకి చేరవేయనుంది. ఇస్రో వాణిజ్య విభాగమైన న్యూస్పేస్ ఇండియా లిమిటెడ్ పర్యవేక్షణలో దేశీయ మరియు విదేశీ వినియోగదారులకు చెందిన ఉపగ్రహాలను ఈ మిషన్ ద్వారా అంతరిక్షంలోకి పంపిస్తున్నారు.
సుమారు 260 టన్నుల బరువున్న ఈ రాకెట్, ప్రయాణం మొదలైన 17 నిమిషాల్లోనే థాయిలాండ్ మరియు బ్రిటన్కు చెందిన ప్రధాన ఉపగ్రహాలను కక్ష్యలో ప్రవేశపెడుతుంది. ఆ తర్వాత మిగిలిన 13 చిన్న ఉపగ్రహాలను కూడా విడిచిపెడుతుంది. అయితే ఈ ప్రయోగంలో ఒక ఆసక్తికరమైన అంశం ఉంది.
ఇది కూడా చదవండి: Hyderabad: 2.50 కోట్లు.. సైబర్ నెరగాల్లో వలలో జేడీ భార్య
రాకెట్ యొక్క నాలుగో దశలో స్పెయిన్ దేశానికి చెందిన ‘కిడ్’ (KID) అనే చిన్న క్యాప్సూల్ను కూడా అమర్చారు. రాకెట్ పని పూర్తయిన తర్వాత, ఆ నాలుగో దశ భాగాన్ని తిరిగి భూ వాతావరణంలోకి సురక్షితంగా తీసుకువచ్చే కొత్త ప్రయోగాన్ని శాస్త్రవేత్తలు ఈసారి చేస్తున్నారు.
శాస్త్రవేత్తల ప్రణాళిక ప్రకారం, పీఎస్ఎల్వీ నాలుగో దశ మరియు ఈ చిన్న క్యాప్సూల్ రెండూ తిరిగి భూమి వైపు ప్రయాణించి దక్షిణ పసిఫిక్ మహాసముద్రంలో పడిపోయేలా జాగ్రత్తలు తీసుకుంటున్నారు. ఇప్పటివరకు పీఎస్ఎల్వీ రాకెట్ ద్వారా చంద్రయాన్-1, మంగళయాన్ మరియు ఆదిత్య-ఎల్1 వంటి ప్రతిష్టాత్మక ప్రయోగాలను ఇస్రో విజయవంతంగా పూర్తి చేసింది. గతేడాది మే నెలలో జరిగిన ఒక ప్రయోగం చిన్న సాంకేతిక కారణంతో ఆశించిన ఫలితాన్ని ఇవ్వలేదు. అందుకే ఈసారి ఎంతో జాగ్రత్తగా, పక్కా ప్రణాళికతో పీఎస్ఎల్వీ-సి62ను విజయవంతం చేయడానికి ఇస్రో బృందం కృషి చేస్తోంది.