Kalvakuntla Kavitha: తెలంగాణ రాజకీయ ముఖచిత్రం శరవేగంగా మారుతోంది. మొన్నటి వరకు బీఆర్ఎస్ పార్టీలో కీలక నేతగా ఉన్న కల్వకుంట్ల కవిత, తన ఎమ్మెల్సీ పదవికి రాజీనామా చేసినప్పటి నుండి రాష్ట్ర రాజకీయాల్లో చర్చనీయాంశంగా మారారు. ఆమె భవిష్యత్ కార్యాచరణపై రకరకాల ఊహాగానాలు వినిపిస్తున్న తరుణంలో, కాంగ్రెస్ ఎమ్మెల్యే మల్రెడ్డి రంగారెడ్డి చేసిన వ్యాఖ్యలు ఇప్పుడు రాజకీయ వర్గాల్లో పెను సంచలనం సృష్టిస్తున్నాయి. కవిత కాంగ్రెస్ తీర్థం పుచ్చుకున్నా ఆశ్చర్యపోవాల్సిన అవసరం లేదని ఆయన వ్యాఖ్యానించడం కొత్త సమీకరణాలకు దారితీస్తోంది.
ఆపరేషన్ ఆకర్ష్.. కవిత కూడా వస్తారా?
మంగళవారం మీడియాతో జరిగిన చిట్చాట్లో మల్రెడ్డి రంగారెడ్డి ఆసక్తికర ఉదాహరణలను ప్రస్తావించారు. దానం నాగేందర్, కడియం శ్రీహరి వంటి సీనియర్ నేతలు కాంగ్రెస్లోకి వస్తారని ఎవరూ ఊహించలేదని, కానీ వారు ప్రస్తుతం పార్టీలో భాగమయ్యారని గుర్తు చేశారు. అదే క్రమంలో కవిత కూడా హస్తం గూటికి చేరే అవకాశం ఉందని ఆయన అభిప్రాయపడ్డారు. ఒకవైపు కవిత సొంతంగా పార్టీ పెడతారని ప్రచారం జరుగుతుంటే, మరోవైపు అధికార పార్టీ ఎమ్మెల్యే ఇలా వ్యాఖ్యానించడం ప్రాధాన్యత సంతరించుకుంది. ఇది కేవలం మల్రెడ్డి వ్యక్తిగత అభిప్రాయమా లేక తెరవెనుక ఏదైనా గట్టి ప్రయత్నం జరుగుతుందా అన్నది ఇప్పుడు హాట్ టాపిక్గా మారింది.
ఇది కూడా చదవండి: Bangladesh: 35 రోజుల్లో 11 మంది హిందువుల హత్య..
మంత్రి పదవిపై ‘స్వీట్ వార్నింగ్’
రాజకీయ వలసల అంశాన్ని ప్రస్తావిస్తూనే, మల్రెడ్డి రంగారెడ్డి తన అసంతృప్తిని కూడా బయటపెట్టారు. చాలా కాలంగా మంత్రి పదవి కోసం వేచి చూస్తున్న ఆయన, ఈ విషయంలో పార్టీ అధిష్టానానికి ఒక రకమైన హెచ్చరిక జారీ చేశారు. తనకు మంత్రి పదవి ఇవ్వకపోతే అది తన కంటే పార్టీకే ఎక్కువ నష్టమని ఆయన వ్యాఖ్యానించారు. రెండు కోట్ల మంది జనాభా ఉన్న రంగారెడ్డి జిల్లాకు ఇప్పటివరకు మంత్రివర్గంలో సరైన ప్రాతినిధ్యం లేకపోవడంపై ఆయన గళమెత్తారు. పార్టీ పెద్దలు తక్షణమే స్పందించి తగిన నిర్ణయం తీసుకోవాలని కోరారు.
ఫ్యూచర్ సిటీ మరియు జిల్లా స్వరూపం
రంగారెడ్డి జిల్లా పేరు మార్పుపై జరుగుతున్న ప్రచారాన్ని ఆయన ఖండించారు. జిల్లాలో ఎన్ని మున్సిపాలిటీలు ఏర్పడినా పర్వాలేదు కానీ, జిల్లా స్వరూపం మరియు పేరు మారకూడదని స్పష్టం చేశారు. అలాగే, రాష్ట్ర ప్రభుత్వం ప్రతిష్టాత్మకంగా భావిస్తున్న ‘ఫ్యూచర్ సిటీ’ గురించి మాట్లాడుతూ, అక్కడ రియల్ ఎస్టేట్ రంగం అనూహ్యంగా పుంజుకుందని, భూముల ధరలు పెరగడంతో రైతులు ఎవరూ భూములు అమ్మే పరిస్థితిలో లేరని పేర్కొన్నారు. గత ప్రభుత్వ హయాంలో ఫార్మాసిటీని వ్యతిరేకించినందుకు తనను ఓడించారని, కానీ ఆ ఫార్మాసిటీ వచ్చి ఉంటే 50 కిలోమీటర్ల మేర కాలుష్యం విస్తరించి ఉండేదని ఆయన విశ్లేషించారు.
మొత్తానికి, ఒకవైపు కవిత రాజకీయ భవిష్యత్తు, మరోవైపు మంత్రి పదవుల కోసం సొంత పార్టీ నేతల ఒత్తిడి.. ఈ పరిణామాలు తెలంగాణ కాంగ్రెస్లో ఎలాంటి మార్పులకు నాంది పలుకుతాయో వేచి చూడాలి.