Vaibhav Suryavanshi: భారత క్రికెట్ భవిష్యత్ ఆశాకిరణం, 14 ఏళ్ల సంచలనం వైభవ్ సూర్యవంశీ సరికొత్త చరిత్ర సృష్టించాడు. దక్షిణాఫ్రికా అండర్-19 జట్టుతో జరిగిన రెండో యూత్ వన్డేలో కేవలం 15 బంతుల్లోనే అర్ధ సెంచరీ బాది, యూత్ వన్డేల్లో వేగవంతమైన హాఫ్ సెంచరీ చేసిన భారతీయుడిగా రికార్డు నెలకొల్పాడు. దక్షిణాఫ్రికాలోని విల్లోమూర్ పార్క్లో జరిగిన మ్యాచ్లో భారత అండర్-19 జట్టు కెప్టెన్ వైభవ్ సూర్యవంశీ ఆకాశమే హద్దుగా చెలరేగిపోయాడు.
గతంలో రిషబ్ పంత్ పేరిట ఉన్న 18 బంతుల హాఫ్ సెంచరీ రికార్డును వైభవ్ తుడిచిపెట్టాడు. తన ఇన్నింగ్స్లో కేవలం 24 బంతులు ఎదుర్కొన్న వైభవ్, 10 సిక్సర్లు, ఒక ఫోర్తో 68 పరుగులు సాధించాడు. అంటే అతను చేసిన మొత్తం పరుగుల్లో 64 పరుగులు కేవలం బౌండరీల రూపంలోనే రావడం గమనార్హం. టాస్ గెలిచి మొదట బ్యాటింగ్ చేసిన దక్షిణాఫ్రికా జట్టు 49.3 ఓవర్లలో 245 పరుగులకు ఆలౌట్ అయింది. ప్రొటీస్ బ్యాటర్లలో జేసన్ రోల్స్ (114) సెంచరీతో రాణించాడు. అయితే భారత బౌలర్ కిషన్ సింగ్ (4/46) అద్భుత స్పెల్తో వారిని కట్టడి చేశాడు.
Also Read: Greenland: గ్రీన్లాండ్ కావాలంటున్న ట్రంప్.. రక్షణ కోసమా?.. ఖనిజాల కోసమా?
వర్షం కారణంగా భారత్ లక్ష్యాన్ని 27 ఓవర్లలో 174 పరుగులుగా కుదించారు. లక్ష్య ఛేదనలో ఓపెనర్లు ఆరోన్ జార్జ్, వైభవ్ సూర్యవంశీ మెరుపు ఆరంభాన్ని ఇచ్చారు. కేవలం 4.1 ఓవర్లలోనే జట్టు స్కోరును 50 పరుగులకు చేర్చారు. వైభవ్ నిష్క్రమించిన తర్వాత వేదాంత్ త్రివేది (31 నాటౌట్), అభిజ్ఞాన్ కుందు (48 నాటౌట్) బాధ్యతాయుతంగా ఆడి భారత్కు విజయాన్ని అందించారు. దక్షిణాఫ్రికా బౌలర్లలో మైఖేల్ క్రూయిస్కాంప్ రెండు వికెట్లు పడగొట్టాడు. ఈ విజయంతో మూడు మ్యాచ్ల సిరీస్లో భారత్ శుభారంభం చేసింది. 14 ఏళ్ల వయసులోనే అంతర్జాతీయ స్థాయిలో ఇటువంటి విధ్వంసకర ఇన్నింగ్స్ ఆడిన వైభవ్, రాబోయే ఐపీఎల్ 2026 సీజన్లో కూడా హాట్ టాపిక్గా మారే అవకాశం ఉంది.