Gold Price Today: గత కొంతకాలంగా సామాన్యులకు చుక్కలు చూపించిన బంగారం ధరలు ఇప్పుడు కాస్త శాంతించాయి. గత వారం రోజులుగా పసిడి రేట్లు క్రమంగా తగ్గుముఖం పట్టడం విశేషం. ఆదివారం నాడు మార్కెట్లో పెద్దగా మార్పులేమీ లేకుండా ధరలు స్థిరంగా కొనసాగుతున్నాయి. పండుగ సీజన్ కావడంతో ధరలు మరింత పెరుగుతాయని భయపడిన కొనుగోలుదారులకు, ఈ తగ్గుదల నిజంగానే పెద్ద ఊరటనిస్తోంది. అంతర్జాతీయ మార్కెట్లో చోటుచేసుకున్న పరిణామాల వల్ల దేశీయంగా కూడా బంగారం రేట్లు అదుపులోకి వచ్చాయి.
తెలుగు రాష్ట్రాల విషయానికి వస్తే.. హైదరాబాద్, విజయవాడలో ధరలు ఒకేలా ఉన్నాయి. ఆదివారం నాడు 24 క్యారెట్ల 10 గ్రాముల ధర రూ.1,35,820 వద్ద కొనసాగుతుండగా, ఆభరణాల తయారీకి వాడే 22 క్యారెట్ల 10 గ్రాముల బంగారం ధర రూ.1,24,500 వద్ద స్థిరంగా ఉంది. దేశ రాజధాని ఢిల్లీలో మాత్రం రేట్లు స్వల్పంగా ఎక్కువగా ఉన్నాయి. అక్కడ 24 క్యారెట్ల గోల్డ్ రూ.1,35,970 కాగా, చెన్నైలో అత్యధికంగా రూ.1,37,460 వద్ద ట్రేడ్ అవుతోంది.
బంగారంతో పాటు వెండి ధరలు కూడా ప్రస్తుతం స్థిరంగానే ఉన్నాయి. అయితే ప్రాంతాలను బట్టి వెండి రేట్లలో కాస్త తేడాలు కనిపిస్తున్నాయి. ఢిల్లీలో కేజీ వెండి ధర రూ.2,41,000 ఉండగా, తెలుగు రాష్ట్రాల్లోని హైదరాబాద్, విజయవాడ, విశాఖపట్నంలలో మాత్రం కేజీ వెండి రూ.2,57,000 పలుకుతోంది. పసిడి ప్రియులు ఈ ధరల తగ్గుదలని గమనించి, ఈ వారం మార్కెట్ ఎలా ఉంటుందో అని ఆసక్తిగా ఎదురుచూస్తున్నారు.