Draksharamam: ప్రసిద్ధ పుణ్యక్షేత్రమైన ద్రాక్షారామ భీమేశ్వరాలయంలో శివలింగాన్ని ధ్వంసం చేసిన వ్యక్తిని పోలీసులు ఎట్టకేలకు పట్టుకున్నారు. ఈ ఘటన స్థానికంగా కలకలం రేపగా, నిందితుడిని తోటపేటకు చెందిన శీలం శ్రీనివాస్గా పోలీసులు గుర్తించారు. కోనసీమ జిల్లా ఎస్పీ రాహుల్ మీనా ఈ కేసుకు సంబంధించిన పూర్తి వివరాలను మీడియాకు వెల్లడించారు. నిందితుడు కావాలనే ఈ పని చేశాడని, దీని వెనుక వ్యక్తిగత కారణాలు ఉన్నాయని ఆయన తెలిపారు.
అసలు విషయం ఏమిటంటే, నిందితుడికి డ్రైనేజీ విషయంలో ఆలయ సిబ్బందితో కొంతకాలంగా గొడవలు జరుగుతున్నాయి. వారిపై ఉన్న కోపంతో, వారిని ఇబ్బంది పెట్టాలనే ఉద్దేశంతోనే శ్రీనివాస్ ఈ దుశ్చర్యకు పాల్పడ్డాడు. సోమవారం అర్ధరాత్రి సమయంలో ఉత్తర గోపురం వద్ద ఉన్న కపాలేశ్వర స్వామి లింగాన్ని ధ్వంసం చేశాడు. మంగళవారం ఉదయం భక్తులు గమనించి ఫిర్యాదు చేయడంతో ఈ దారుణం వెలుగులోకి వచ్చింది.
ఈ కేసును పోలీసులు చాలా సీరియస్గా తీసుకున్నారు. క్లూస్ టీమ్, డాగ్ స్క్వాడ్ సాయంతో క్షుణ్ణంగా తనిఖీలు చేపట్టారు. ఘటన జరిగిన చోట నేరుగా సిసి కెమెరాలు లేకపోయినా, చుట్టుపక్కల వీధుల్లో ఉన్న కెమెరాల ఫుటేజీని నిశితంగా పరిశీలించారు. ఆ ఆధారాలతోనే నిందితుడిని వేగంగా గుర్తించి అరెస్ట్ చేశారు. ప్రస్తుతం నిందితుడు పోలీసుల అదుపులో ఉన్నాడు.