Imad Wasim: పాకిస్థాన్ క్రికెట్ ఆల్రౌండర్ ఇమాద్ వసీం తన వైవాహిక బంధానికి ముగింపు పలికారు. గత కొన్ని ఏళ్లుగా భార్య సానియా అష్ఫాక్తో నెలకొన్న విభేదాల కారణంగా తాను విడాకులకు దరఖాస్తు చేసినట్లు ఆయన అధికారికంగా ప్రకటించారు. 2019 ఆగస్టులో వీరి వివాహం అట్టహాసంగా జరిగింది. ఆరేళ్ల ఈ బంధంలో వీరికి ముగ్గురు సంతానం ఉన్నారు.
విడాకుల నిర్ణయంపై ఇమాద్ ఇన్స్టాగ్రామ్లో ఒక ప్రకటన విడుదల చేశారు. “గత కొన్నేళ్లుగా మా మధ్య పదేపదే తలెత్తుతున్న విభేదాలను పరిష్కరించుకోవడం సాధ్యం కాలేదు. అందుకే చాలా ఆలోచించి విడాకులు తీసుకోవాలని నిర్ణయించుకున్నాను. పిల్లల బాధ్యతను ఒక తండ్రిగా నేను ఎప్పటికీ పూర్తి బాధ్యతతో నిర్వహిస్తాను.
ఇది కూడా చదవండి: Khaleda Zia: బంగ్లాదేశ్ మాజీ ప్రధాని బేగం ఖలీదా జియా కన్నుమూత
దయచేసి మా వ్యక్తిగత విషయంలో తప్పుడు ప్రచారాలను నమ్మవద్దు,” అని ఇమాద్ పేర్కొన్నారు. అంతేకాకుండా, పాత ఫోటోలను షేర్ చేయవద్దని ఇకపై సానియాను తన భార్యగా సంబోధించవద్దని ఆయన అభిమానులను కోరారు.
ఇమాద్ ప్రకటన వెలువడిన కొన్ని గంటలకే ఆయన భార్య సానియా అష్ఫాక్ తన సోషల్ మీడియా వేదికగా అత్యంత భావోద్వేగమైన సంచలన పోస్ట్ చేశారు. “నా ఇల్లు ముక్కలైంది, నా పిల్లలు తండ్రికి దూరమయ్యారు. మా వివాహ బంధంలో సమస్యలు ఉన్నప్పటికీ, భార్యగా, తల్లిగా కుటుంబాన్ని కాపాడుకోవడానికి నేను ఎంతో ప్రయత్నించాను. కానీ, మా జీవితంలోకి ప్రవేశించిన ఓ ‘మూడో వ్యక్తి’ కారణంగానే ఈ బంధం ముగిసింది. నా భర్తను పెళ్లి చేసుకోవాలనే ఉద్దేశంతో ఆమె ప్రవర్తించిన తీరు మా బంధానికి కోలుకోలేని దెబ్బ తీసింది,” అని సానియా ఆరోపించారు. తమ ఐదు నెలల పసికందును ఇప్పటివరకు ఇమాద్ కనీసం ఎత్తుకోలేదని ఆమె ఆవేదన వ్యక్తం చేశారు.
వృత్తిపరంగా చూస్తే, ఇమాద్ వసీం 2024 డిసెంబర్లో అంతర్జాతీయ క్రికెట్కు రెండోసారి వీడ్కోలు పలికారు. గతంలో రిటైర్మెంట్ ప్రకటించినప్పటికీ, 2024 టీ20 ప్రపంచకప్ కోసం తన నిర్ణయాన్ని వెనక్కి తీసుకుని జట్టులోకి తిరిగి వచ్చారు. తన కెరీర్లో పాకిస్థాన్ తరపున 55 వన్డేలు, 75 టీ20 మ్యాచ్లు ఆడి మొత్తం 1,540 పరుగులు చేయడంతో పాటు 117 వికెట్లు పడగొట్టారు. 2017 ఛాంపియన్స్ ట్రోఫీ విజేతగా నిలిచిన పాక్ జట్టులో ఆయన కీలక సభ్యుడిగా ఉన్నారు. ప్రస్తుతం ఈ విడాకుల వ్యవహారం సోషల్ మీడియాలో హాట్ టాపిక్గా మారింది. సానియా చేసిన ఆరోపణలపై ఇమాద్ స్పందిస్తూ, అది తనను అవమానించే ప్రయత్నమని, చట్టపరమైన మార్గంలోనే దీనికి పరిష్కారం వెతుకుతానని స్పష్టం చేశారు.