Venkatesh: విక్టరీ వెంకటేష్ గురించి తెలుగు ప్రేక్షకులకు ప్రత్యేకంగా పరిచయం చేయవలసిన అవసరం లేదు. వచ్చే ఏడాది ఆయన చిత్ర పరిశ్రమలోకి అడుగుపెట్టి 40 ఏళ్లు పూర్తి కావస్తోంది. ఆయన గురించి ఎవరిని అడిగినా.. ఆయన క్రమశిక్షణ, నటన గురించి ఒక్కొక్కరు ఒక్కో కథ చెబుతుంటారు. దివంగత నిర్మాత దగ్గుబాటి రామానాయుడు వారసుడిగా ఎంట్రీ ఇచ్చిన వెంకటేష్.. యాక్షన్, ఫ్యామిలీ ఎంటర్టైనర్, థ్రిల్లర్, కామెడీ మరియు మల్టీస్టారర్ సినిమాలు చేసి అందరి ఆదరణ పొందారు. ఒక పెద్ద నిర్మాణ సంస్థ నుండి వచ్చినప్పటికీ, తనకంటూ ఒక ప్రత్యేక గుర్తింపును సంపాదించుకున్నారు.
తర్వాత తరం వారసులు
దగ్గుబాటి కుటుంబం నుండి ఇప్పటికే నెక్స్ట్ జనరేషన్ హీరోలుగా రానా దగ్గుబాటి, అభిరామ్ దగ్గుబాటి ఇండస్ట్రీలోకి ఎంట్రీ ఇచ్చారు. రానా ‘బాహుబలి’ సినిమాతో పాన్ ఇండియా గుర్తింపు తెచ్చుకున్నప్పటికీ, ప్రస్తుతం ఆయన దృష్టి సినిమా నిర్మాణంపైనే ఉంది. మంచి కథలు వచ్చినప్పుడు మాత్రమే నటుడిగా కనిపిస్తున్నారు. మరోవైపు, అభిరామ్ గత ఏడాది తేజ దర్శకత్వంలో ‘అహింస’ సినిమాతో అరంగేట్రం చేశారు. ప్రస్తుతం ఆయన కూడా వైవిధ్యమైన కథల కోసం ఎదురుచూస్తున్నారు.
అందరి దృష్టి అర్జున్ పైనే..
ఇప్పుడు అందరి దృష్టి వెంకటేష్ కుమారుడు అర్జున్ ఎంట్రీపై ఉంది. వెంకటేష్ నట వారసత్వాన్ని ముందుకు తీసుకెళ్లడానికి అర్జున్ సిద్ధంగా ఉన్నట్లు తెలుస్తోంది. ఆయన వయసు ప్రస్తుతం 21 ఏళ్లు. అర్జున్ ప్రస్తుతం అమెరికాలో తన ఉన్నత విద్యను (Higher Education) పూర్తి చేసే పనిలో బిజీగా ఉన్నారు. మరో రెండు మూడు సంవత్సరాల్లో చదువు పూర్తయ్యే అవకాశం ఉంది. ఆ తర్వాత యాక్టింగ్ క్లాసులు తీసుకుని తన తొలి సినిమా చేయనున్నట్లు సమాచారం.
ఇది కూడా చదవండి: Egg Price Hike: కోడిగుడ్డు రేట్.. ఆల్ టై రికార్డ్ బ్రేక్
సోషల్ మీడియాకు దూరం
ఇక్కడ మెచ్చుకోవాల్సిన విషయం ఒకటి ఉంది. ఇండస్ట్రీలో ఉన్న దాదాపు ప్రతి హీరో పిల్లల ఫోటోలు ఏదో ఒక విధంగా సోషల్ మీడియాలో కనిపిస్తూనే ఉంటాయి. కానీ, అర్జున్ ఫోటోలు మాత్రం ఇంతవరకు ఎక్కడా బయటకు రాలేదు. ఆయన ఎలా ఉంటారో కూడా చాలా మందికి తెలియదు. ఆ విషయంలో దగ్గుబాటి ఫ్యామిలీ చాలా గోప్యత పాటిస్తోంది.
ఆ ఒక్క ఫంక్షన్లోనే దర్శనం
చాలా కాలం తర్వాత తెలుగు ఇండస్ట్రీలో మల్టీస్టారర్ ట్రెండ్ స్టార్ట్ చేసిన సినిమా ‘సీతమ్మ వాకిట్లో సిరిమల్లె చెట్టు’. ఈ సినిమాలో మహేష్ బాబుతో కలిసి వెంకటేష్ నటించారు. ఈ సినిమా ఆడియో ఫంక్షన్ సమయంలో ఘట్టమనేని గౌతమ్తో కలిసి స్టేజ్ పైన ఒకసారి అర్జున్ కనిపించారు. అప్పుడు ఆయన వయసు పది సంవత్సరాలు ఉండవచ్చు. ఆ తర్వాత మళ్లీ ఎక్కడా కనిపించలేదు.
వారసుడి కోసం వెంకటేష్ ఎదురుచూపు
ప్రస్తుతం అర్జున్ వయసు సుమారు 22-23 ఏళ్లు ఉంటుంది. ఈ వయసులో ఇండస్ట్రీలోకి ఎంట్రీ ఇస్తే, తనకంటూ ఒక క్రేజ్ సంపాదించుకుని నిలదొక్కుకునే అవకాశం ఉంటుంది. గతంలో ‘బాబు బంగారం’ సినిమా ప్రీ-రిలీజ్ ఈవెంట్లో వెంకటేష్ తన రిటైర్మెంట్ గురించి స్పందిస్తూ.. తన వారసుడు ఎంట్రీ ఇచ్చే వరకు సినిమాలు చేస్తూనే ఉంటానని సరదాగా వ్యాఖ్యానించారు. మరి అర్జున్ ఎప్పుడు ఎంట్రీ ఇస్తారో, ఎలాంటి కథతో వస్తారో చూడాలని అభిమానులు ఆసక్తిగా ఎదురుచూస్తున్నారు.