Kusuma Krishnamurthy: తెలుగు రాజకీయాల్లో తీవ్ర విషాదం నెలకొంది. ఆంధ్రప్రదేశ్కు చెందిన ప్రముఖ రాజకీయ నాయకులు, మాజీ ఎంపీ కుసుమ కృష్ణమూర్తి గారు (85) ఇక లేరు. శుక్రవారం/శనివారం తెల్లవారుజామున గుండెపోటు రావడంతో ఢిల్లీలోని ఓ ఆసుపత్రిలో ఆయన తుదిశ్వాస విడిచారు. ఈ విషాద వార్తను కుటుంబ సభ్యులు ధృవీకరించారు.
ఆయన మరణం పట్ల కాంగ్రెస్ పార్టీ సీనియర్ నేతలు సహా తూర్పుగోదావరి, డాక్టర్ బీఆర్ అంబేద్కర్ కోనసీమ, కాకినాడ జిల్లాలకు చెందిన ప్రజాప్రతినిధులు, రాజకీయ ప్రముఖులు తీవ్ర సంతాపం తెలిపారు. కృష్ణమూర్తి గారి కుటుంబానికి తమ ప్రగాఢ సానుభూతిని తెలియజేశారు.
మూడుసార్లు ఎంపీగా గెలుపు, ప్రజాసేవలో క్రియాశీలక పాత్ర
కుసుమ కృష్ణమూర్తి గారు 1940 సెప్టెంబర్ 11న ఉమ్మడి తూర్పు గోదావరి జిల్లా, అయినవిల్లి మండలం, విలస గ్రామంలో జన్మించారు. శ్రీ కోనసీమ భానోజీ రామర్స్ కాలేజీలో ప్రాథమిక విద్యను పూర్తి చేసి, ఆంధ్ర విశ్వవిద్యాలయం, నాగ్పూర్ విశ్వవిద్యాలయం నుంచి ఎంఏ పట్టా పొందారు.
ఇది కూడా చదవండి: Harish Rao: రాహుల్గాంధీ రాకపై హరీశ్రావు సంచలన వ్యాఖ్యలు
విద్య తర్వాత కాంగ్రెస్ పార్టీ ద్వారా రాజకీయాల్లో అడుగుపెట్టిన ఆయన పార్టీలో వివిధ కీలక పదవుల్లో పనిచేశారు. అమలాపురం లోక్సభ నియోజకవర్గం నుంచి కాంగ్రెస్ పార్టీ అభ్యర్థిగా పోటీ చేసి మూడుసార్లు ఘన విజయం సాధించారు.
-
6వ లోక్సభ (1977–1979)
-
7వ లోక్సభ (1980–1984)
-
9వ లోక్సభ (1989–1991)
లకు ఆయన ప్రాతినిధ్యం వహించారు. నిస్వార్థ ప్రజాసేవతో ఉత్తమ ఎంపీగా మంచి గుర్తింపు తెచ్చుకున్నారు.
కీలక పదవులు, దళితుల సమస్యలపై ప్రత్యేక దృష్టి
కుసుమ కృష్ణమూర్తి గారికి దళితుల సమస్యలపై ప్రత్యేక ఆసక్తి ఉండేది. ఆ వర్గాల సంక్షేమం కోసం ఆయన ఎంతో కృషి చేశారు. నవంబర్ 1983 నుంచి జనవరి 1985 వరకు ఆల్ ఇండియా కాంగ్రెస్ కమిటీ జాయింట్ సెక్రటరీగా పనిచేసిన అయన 1990లో పెట్రోలియం అండ్ కెమికల్స్ మంత్రిత్వ శాఖలో బాధ్యతలు నిర్వర్తించారు. 1980 నుంచి 1982 వరకు షెడ్యూల్డ్ కులాలు, షెడ్యూల్డ్ తెగల సంక్షేమంపై సంయుక్త సెలెక్ట్ కమిటీ కన్వీనర్గా పనిచేశారు.
ఆయన ‘దళిత వేదం’ పేరుతో ఓ పుస్తకాన్ని కూడా రచించారు. కాంగ్రెస్ పార్టీతో ఎంతో అనుబంధం ఉన్నప్పటికీ, కుసుమ కృష్ణమూర్తి గారు చాలా ఏళ్లుగా రాజకీయాలకు దూరంగా ఉంటున్నారు. మూడుసార్లు ఎంపీగా, కీలక పదవుల్లో పనిచేసి, తనదైన ముద్ర వేసిన ఆయన మరణం తెలుగు రాజకీయాలకు తీరని లోటు.