Russia Earthquake: రష్యా (Russia) సుదూర తూర్పు ప్రాంతంలోని కమ్చట్కా ద్వీపకల్పం (Kamchatka Peninsula) వరుస ప్రకంపనలతో వణికిపోతున్నది. శుక్రవారం తెల్లవారుజామున పెట్రోపావ్లోవ్స్‌-కామ్చాట్‌స్కీ (Petropavlovsk-Kamchatsky) పరిసర ప్రాంతంలో రిక్టర్ స్కేలుపై 7.8 తీవ్రతతో భారీ భూకంపం నమోదైంది. భూకంప కేంద్రం భూమికి 10 కిలోమీటర్ల లోతులో ఉన్నట్లు యూఎస్‌ జియోలాజికల్‌ సర్వే (USGS) వెల్లడించింది. ఈ ప్రకంపనల అనంతరం 5.8 తీవ్రతతో మరొకసారి భూమి కంపించింది. దీంతో అధికారులు వెంటనే సునామీ హెచ్చరిక జారీ చేసి, అత్యవసర సేవలను హై అలర్ట్‌లో ఉంచారు.
భయానక దృశ్యాలు – ప్రజలు రోడ్లపైకి పరుగులు
అర్ధరాత్రి దాటాక అకస్మాత్తుగా భూమి కంపించడంతో ప్రజలు తీవ్ర భయాందోళనకు గురయ్యారు. ఇళ్లలోని సామాను కిందపడిపోవడం, కిటికీలు, తలుపులు బిగ్గరగా మూసుకుపోవడంతో ప్రజలు రోడ్లపైకి పరుగులు తీశారు. కొద్దిసేపటి పాటు కొనసాగిన శక్తివంతమైన ప్రకంపనలు ఆగిన తర్వాత కూడా పలుమార్లు స్వల్ప తీవ్రతతో భూమి కంపించిందని స్థానికులు చెబుతున్నారు. అయితే ఇప్పటివరకు ప్రాణ, ఆస్తి నష్టాలపై స్పష్టమైన సమాచారం అందలేదు.
ఇది కూడా చదవండి: Crime News: అమెరికా పోలీసుల కాల్పుల్లో పాలమూరు యువకుడి మృతి
వరుసగా భూకంపాల సవాలు
ఇదే ప్రాంతంలో గత కొద్ది వారాలుగా వరుస ప్రకంపనలు నమోదవుతున్నాయి.
-
జూలై 30న 8.8 తీవ్రతతో భారీ భూకంపం చోటుచేసుకోగా,
-
జూలై 31న కురిల్‌ దీవుల్లో 6.5 తీవ్రతతో భూమి కంపింది.
-
ఆగస్టు 5న కమ్చట్కా తీరంలో 6.0 తీవ్రత నమోదైంది.
-
ఈ నెల 14న 7.4 తీవ్రతతో మరొకసారి ప్రకంపనలొచ్చాయి.
ఈ వరుస భూకంపాలు స్థానిక ప్రజల్లో ఆందోళనను పెంచుతున్నాయి.
ఇండోనేషియాలో కూడా ప్రకంపనలు
మరోవైపు ఇండోనేషియాలో (Indonesia) సెంట్రల్‌ పపువా ప్రావిన్స్‌లో శుక్రవారం తెల్లవారుజామున 6.1 తీవ్రతతో భూమి కంపించిందని యూఎస్‌జీఎస్‌ తెలిపింది. భూకంప కేంద్రం 28 కిలోమీటర్ల దూరంలో ఉన్నట్లు అధికారులు గుర్తించారు.
తూర్పు ఆసియా ప్రాంతం అంతా వరుస ప్రకంపనలతో వణికిపోతుండటంతో అక్కడి ప్రజల్లో భయం, ఆందోళన కొనసాగుతోంది.