Mancherial: మంచిర్యాల జిల్లాలో ఒక హృదయ విదారక ఘటన చోటు చేసుకుంది. దండేపల్లి మండలం నంబాల గ్రామంలో ఆరేళ్ల చిన్నారి అనుమానాస్పద స్థితిలో మరణించడం స్థానికంగా కలకలం రేపింది. మహాన్విత (6) అనే బాలిక మృతదేహాన్ని గ్రామ శివారులోని ఒక పాడుబడిన బావిలో స్థానికులు గుర్తించారు. బాలిక రెండు రోజుల క్రితం ఇంట్లో కనిపించకుండా పోయింది. ఈ విషయం తెలిసి కుటుంబ సభ్యులు, గ్రామస్తులు తీవ్ర ఆందోళన చెందారు.
అయితే, గురువారం రోజున బాలిక మృతదేహం బావిలో లభ్యం కావడంతో కుటుంబంలో విషాద ఛాయలు అలుముకున్నాయి. తమ చిన్నారిని ఎవరో హత్య చేసి బావిలో పడేశారని బాలిక తల్లిదండ్రులు తీవ్రంగా ఆరోపిస్తున్నారు. తమ బిడ్డ సహజంగా చనిపోలేదని, దీని వెనుక ఏదో కుట్ర ఉందని వారు కన్నీరుమున్నీరవుతున్నారు. వారి ఆరోపణలు, సంఘటన జరిగిన తీరు చూస్తుంటే ఇది కేవలం ప్రమాదం కాదని స్పష్టమవుతోంది.
ఈ ఘటన గురించి సమాచారం అందుకున్న పోలీసులు వెంటనే నంబాల గ్రామానికి చేరుకున్నారు. బాలిక తల్లిదండ్రులు ఇచ్చిన ఫిర్యాదు మేరకు పోలీసులు కేసు నమోదు చేశారు. అనుమానాస్పద మృతిగా కేసు నమోదు చేసి దర్యాప్తు ప్రారంభించారు. అసలు బాలిక కనిపించకుండా పోవడానికి కారణం ఏమిటి? ఆమెను ఎవరైనా కిడ్నాప్ చేశారా? చంపి బావిలో పడేశారా? అనే కోణంలో పోలీసులు కూపీ లాగుతున్నారు. ఈ కేసులో నిజాలు త్వరలోనే బయటపడతాయని స్థానికులు, కుటుంబ సభ్యులు ఆశగా ఎదురుచూస్తున్నారు.