GST Council Meeting: కేంద్ర ఆర్థిక మంత్రి నిర్మలా సీతారామన్ అధ్యక్షతన 56వ జీఎస్టీ కౌన్సిల్ సమావేశం ఢిల్లీలో జరిగింది. ఈ భేటీకి దాదాపు అన్ని రాష్ట్రాల ఆర్థిక మంత్రులు లేదా వారి ప్రతినిధులు హాజరయ్యారు. ప్రధానంగా, ప్రస్తుతం ఉన్న జీఎస్టీ రేట్ల శ్లాబులను సులభతరం చేయడంపై ఈ సమావేశంలో చర్చ జరిగింది.
ప్రస్తుతం ఉన్న 5%, 12%, 18%, 28% శ్లాబులకు బదులుగా, కేవలం రెండు ప్రధాన శ్లాబులను – 5%, 18% – మాత్రమే ఉంచాలనే ప్రతిపాదన ఉంది. దీనివల్ల నిత్యం వాడే వస్తువులపై పన్ను తగ్గి, సామాన్యులపై భారం తగ్గుతుందని ప్రభుత్వం భావిస్తోంది. అదే సమయంలో, పొగాకు, మద్యం, లగ్జరీ కార్లు వంటి కొన్ని ప్రత్యేక వస్తువులపై 40% వరకు పన్ను విధించాలని కూడా కౌన్సిల్ యోచిస్తోంది. జీవిత బీమా, ఆరోగ్య బీమాలపై ఉన్న 18% పన్నును పూర్తిగా మినహాయించే అవకాశం కూడా ఉంది.
ఈ మార్పులపై కొన్ని ఎనిమిది ప్రతిపక్ష పార్టీల పాలనలో ఉన్న రాష్ట్రాలు అభ్యంతరం వ్యక్తం చేశాయి. ఈ రాష్ట్రాలకు జీఎస్టీలో మార్పుల వల్ల వార్షికంగా రూ. 1.5 లక్షల కోట్ల నుండి రూ. 2 లక్షల కోట్ల వరకు ఆదాయం తగ్గుతుందని ఆందోళన వ్యక్తం చేశాయి. దీనికి ప్రధాన కారణం, రాష్ట్రాలకు ఇచ్చే జీఎస్టీ పరిహార సెస్ కొనసాగించడంపై కేంద్రం స్పష్టత ఇవ్వకపోవడం. కరోనా మహమ్మారి సమయంలో రాష్ట్రాలకు ఆర్థికంగా సహాయం అందించడానికి తీసుకున్న రుణం దాదాపు చెల్లింపు పూర్తయిన నేపథ్యంలో, ఈ సెస్సును అక్టోబర్ 2025 తర్వాత నిలిపివేసే అవకాశం ఉంది. అయితే, రాష్ట్రాలు తమ ఆర్థిక పరిస్థితి ఇంకా బలపడలేదని, ఈ సెస్సును మరికొంత కాలం పొడిగించాలని డిమాండ్ చేస్తున్నాయి.
Also Read: Donald Trump: మారిన ట్రంప్ వైఖరి.. భారత్ పై ప్రశంసలు
ప్రధాని నరేంద్ర మోదీ దీపావళి నాటికి జీఎస్టీ రేట్లు తగ్గిస్తామని ప్రకటించిన నేపథ్యంలో ఈ సమావేశం ప్రాధాన్యత సంతరించుకుంది. ఈ సంస్కరణలు దేశ జీడీపీని మరింత బలోపేతం చేస్తాయని కేంద్రం ఆశిస్తోంది. ఎస్‌బీఐ రీసెర్చ్ ప్రకారం, పన్ను తగ్గింపుల వల్ల వినియోగదారుల ఖర్చు రూ. 5.31 లక్షల కోట్లు పెరిగే అవకాశం ఉందని, ఇది దేశ జీడీపీలో 1.6% పెరుగుదలకు దారితీస్తుందని అంచనా. ఈ మార్పులు ఆత్మనిర్భర్ భారత్ లక్ష్యానికి అనుగుణంగా ఉన్నాయని కేంద్రం పేర్కొంది. ఆంధ్రప్రదేశ్ ముఖ్యమంత్రి చంద్రబాబు నాయుడు కూడా జీఎస్టీ సంస్కరణలకు పూర్తిగా మద్దతు తెలిపారని రాష్ట్ర ఆర్థిక మంత్రి పయ్యావుల కేశవ్ వెల్లడించారు.