Movie Review: ఎస్‌వీ క్రియేషన్స్ బ్యానర్‌పై ఊడుగు సుధాకర్ నిర్మాతగా ఇస్మాయిల్ షేక్ దర్శకత్వంలో ఎస్ఎస్ సైదులు హీరోగా భ్రమరాంబిక, అర్పిత లోహి హీరోయిన్లుగా ఎం. ఎల్. రాజా సంగీత దర్శకత్వంలో తెరకెక్కిన సినిమా ‘1980లో రాధేకృష్ణ’. ఈ సినిమాని తెలుగు, బంజారా భాషల్లో నేడు విడుదల చేశారు. ఈ సినిమాకి సంబంధించిన టీజర్, ట్రైలర్, సాంగ్స్ ఇప్పటికే ప్రేక్షకులను ఆకట్టుకున్నాయి. మరి సినిమా ఎలా ఉంది? అనేది తెలుసుకోవాలంటే ముందు కథలోకి వెళ్దాం..
కథ:
Movie Review: వంశీ తన కుటుంబంతో జాతర కోసం తన సొంతూరు కృష్ణలంక అనే గ్రామానికి వెళ్తాడు. అక్కడ కర్రసాము పోటీలు జరగడం ఆనవాయితీ. వంశీ కొడుకు రాధ వాళ్ల నాన్నని కర్రసాము గురించి అడుగుతాడు. వాళ్ల ఊళ్లో కర్రసాము పోటీలో కృష్ణ(ఎస్ఎస్ సైదులు)ను ఓడించేవాళ్లే లేరు అని చెబుతాడు. ఆ కృష్ణ గురించి చెప్పడం మొదలు పెట్టడంతో 1980లో ఈ కథ ప్రారంభం అవుతుంది. కృష్ణ(ఎస్ఎస్ సైదులు), వంశీ ఇద్దరు మంచి స్నేహితులు. వంశీ ఎక్కువ కులం, కృష్ణ తక్కువ కులం అయినా వాళ్ల మధ్య ఆ భావన లేకుండా కాలేజీలో మంచి మిత్రులుగా ఉంటారు. వంశీ పెద్దనాన్న రాఘవయ్య ఆ ఊరికి సర్పంచ్. ఆయనకు కులపిచ్చి బాగా ఎక్కువ. ఆయన కుమార్తె రాధ(భ్రమరాంబిక) వంశీ చదివే కాలేజీలో జాయిన్ అవుతుంది. అక్కడ కృష్ణతో రాధ ప్రేమలో పడుతుంది. అక్కడి నుంచి అసలు కథ మొదలవుతుంది. రాధ-కృష్ణ ప్రేమ ఫలించిందా? లేదా ఆ ఊళ్లో కుల వివక్ష వాళ్ల ప్రేమను బలితీసుకుందా? ప్రేమ కథ మధ్యలో మావోయిస్టులు ఏం చేశారు? ఇలాంటి ప్రశ్నలకు సమాధానం తెలియాలంటే సినిమా చూడాల్సిందే.
విశ్లేషణ:
Movie Review: ఈ సినిమా గ్రామీణ నేపథ్యంలో తెరకెక్కింది. గ్రామాల్లో కులాల మధ్య ఉన్న విభేదాల వల్ల ప్రేమికులు ఎన్ని ఇబ్బందులు ఎదుర్కొన్నారు. ప్రతి మనిషిలో ఈ కుల పిచ్చి లేకుండా ఎలా మార్పు తీసుకురావాలి అనే అంశం నేపథ్యంలో డైరెక్టర్ షేక్ ఇస్మాయిల్ ఈ చిత్రాన్ని రూపొందించారు. గతంలో కూడా చాలా సినిమాలు గ్రామీణ నేపథ్యంలో వచ్చి మంచి హిట్ అందుకున్నాయి. ఆ కోవలోనే ఈ చిత్రం కూడా అందమైన ప్రేమకథను తెలియజేస్తూనే.. అంతర్లీనంగా కుల వివక్ష నిర్మూలన గురించి మంచి సందేశం ఇస్తుంది. మానవతాన్ని మించిన కులం ఏముంటుంది? అనే డైలాగ్ ఆలోచింపజేసేలా ఉంది. ఫస్ట్ హాఫ్ అంతా ప్రేమకథతో సాఫీగా సాగిపోతుంది. ఇక సెకెండాఫ్ చాలా ఆసక్తికరంగా ఉంటుంది. ఒకవైపు అడవిలో అన్నలు.. మరోవైపు వాళ్లను వెంటాడే పోలీసులు. వీరిద్దరి మధ్యలో స్వచ్ఛమైన ప్రేమను కాపాడుకోవడం కోసం ప్రేమికుల పోరాటం. మొత్తంగా ఈ సినిమా ప్రేక్షకులకు సరికొత్త అనుభూతిని పంచుతుందని చెప్పొచ్చు.
కృష్ణలంక అనే గ్రామంలో డిగ్రీలు చదివిన యువకులే సమాజంలో జరుగుతున్న అన్యాయాలు, అరాచకాలను ఎదుర్కొనేందుకు మావోయిస్టులుగా మారడాన్ని చూపించారు. వాళ్ల ఉద్దేశం మంచిదే కానీ వాళ్లు ఎంచుకున్న మార్గం సరైనది కాదనేలా చెబుతూ దర్శకుడు తన స్క్రీన్‌ప్లేతో ప్రేక్షకులను ఆలోచింపజేస్తాడు. హీరో కృష్ణ తన నాన్న భావాలను ఆదర్శంగా తీసుకుని కులాల నిర్మూలనకు ఏ విధంగా పాటు పడ్డాడు అనేది చాలా చక్కగా చూపించారు. ఒకే ఒక్క సంఘటనతో అగ్రకులాల వారిలో మార్పు వచ్చేలా చూపించి కథను ముగించడం బాగుంది.
సాంకేతిక విశ్లేషణ:
Movie Review: సాంకేతికంగా ఈ సినిమా చాలా బాగుంది. దర్శకుడు షేక్ ఇస్మాయిల్ తను ఎంచుకున్న పాయింట్‌ను ఏ మాత్రం తడబాటు లేకుండా చెప్పడంలో సక్సెస్ అయ్యాడు. ఎం. రాజేష్, చరణ్, ఖమ్మం బాబు, జ్ఞానేశ్వర్, వై ఉపేందర్ అనే కుర్రాళ్లు రాసిన డైలాగ్స్ సినిమాను మరో మెట్టు ఎక్కించాయి. ఎంఎల్ రాజా ఇచ్చిన సంగీతం కూడా కథకు చాలా హెల్ప్ అయింది. పాటలు అన్నీ చాలా బాగున్నాయి. తనే లిరిక్స్ రాసి ట్యూన్ కట్టడం వల్ల పాటలు అన్నీ చక్కగా కుదిరాయి. తూరుపు రవికిరణం సాంగ్ ఎమోషనల్‌గా ఉంది. నిర్మాత ఊడుగు సుధాకర్ ఎక్కడా తగ్గకుండా ఈ సినిమాను చక్కగా నిర్మించారు.
నటీనటుల విశ్లేషణ:
Movie Review: హీరోగా నటించిన ఎస్ఎస్ సైదులు తన చక్కటి అభినయంతో ఆకట్టుకున్నాడు. అమాయకుడిగా, ప్రేమికుడిగా, పోరాట యోధుడిగా అన్ని వేరియషన్స్ పలికించాడు. హీరో ఫ్రెండ్‌గా వంశీ పాత్ర పోషించిన అతను కూడా ది బెస్ట్ పర్ఫ్మార్మెన్స్ ఇచ్చాడు. ఇక హీరోయిన్లు భ్రమరాంబిక, అర్పిత లోహి కూడా తమ పాత్రలకు న్యాయం చేశారు. భ్రమరాంబిక పాత్ర నిడివి ఎక్కువ ఉండడంతో ఆమెకు తన నటనను ప్రదర్శించే ఆస్కారం ఎక్కువ ఉంది. తన నటన, అందంతో భ్రమరాంబిక ఆకట్టుకుంది. మిగిలిన పాత్రధారులు కూడా తమ పాత్రల పరిధి మేరకు నటించారు.
చివరిగా.. మావోయిస్టు కొడుక్కి, సర్పంచ్ కూతురికి మధ్య ప్రేమ పోరాటమే ‘1980లో రాధేకృష్ణ’.
రేటింగ్: 3/5
నటీనటులు : ఎస్ఎస్ సైదులు, భ్రమరాంబిక, అర్పిత లోహి తదితరులు
టెక్నీషియన్స్ :
నిర్మాణం : ఎస్ వి క్రియేషన్స్
నిర్మాత : వూడుగు సుధాకర్
డిఓపి : ఇలియాజ్ పాషా
రైటర్ : రాజేష్ మాచర్ల
డైలాగ్స్ : ఎం. రాజేష్, చరణ్, ఖమ్మం బాబు, జ్ఞానేశ్వర్, వై ఉపేందర్
తెలుగు లిరిక్స్ : ఎంఎల్ రాజా
బంజారా లిరిక్స్ : ఎం. శ్రీనివాస్ చౌహన్
మ్యూజిక్ : ఎంఎల్ రాజా
దర్శకుడు : ఇస్మాయిల్ షేక్
డిజిటల్ మీడియా : డిజిటల్ దుకాణం
పిఆర్ఓ : మధు VR