Renuka:కాంగ్రెస్ సీనియర్ నాయకురాలు మరియు రాజ్యసభ సభ్యురాలు రేణుకా చౌదరి పార్లమెంట్ సమావేశాలకు ఒక కుక్కపిల్లను తీసుకుని రావడం తీవ్ర వివాదానికి దారితీసింది. ఈ సంఘటన సోషల్ మీడియాలో, రాజకీయ వర్గాల్లో పెద్ద చర్చనీయాంశంగా మారింది. కారులో ఆమె వెంట కుక్కపిల్ల కనిపించడంతో అక్కడున్నవారు ఆశ్చర్యపోయారు.
శీతాకాల సమావేశాలకు హాజరయ్యేందుకు రేణుకా చౌదరి ఉదయం పార్లమెంట్కు చేరుకున్నారు. ఆమెతో పాటు కారులో కుక్కపిల్ల ఉండటంపై మీడియా ప్రశ్నించగా, పార్లమెంట్కి వస్తున్న సమయంలో రోడ్డుపై ప్రమాదంలో పడేలా ఉన్న ఆ జంతువును చూసి కాపాడానని తెలిపారు. పార్లమెంట్కు జంతువును తీసుకురావద్దని ఎక్కడా చట్టం లేదని, ఒక జీవి ప్రాణాన్ని కాపాడడం తప్పా అని ప్రశ్నించారు. అనంతరం ఆ కుక్కపిల్లను వెంటనే కారులోనే తిరిగి పంపించినట్లు స్పష్టం చేశారు.
ఈ సందర్భంలో ఆమె ప్రభుత్వంపై విమర్శలు చేస్తూ, “కరవడానికి మనుషులే పార్లమెంట్లోపల ఉన్నారు, ప్రభుత్వాన్ని నడిపిస్తున్నారు. దాంతో మీకేమీ సమస్య లేదేగా? కానీ నేను ఒక ప్రాణిని కాపాడితే మాత్రం పెద్ద చర్చ చేస్తున్నారా?” అని వ్యాఖ్యానించారు. ఈ వ్యాఖ్యలు మరింత రాజకీయ దుమారానికి దారితీశాయి.
రేణుకా చౌదరి చేసిన వ్యాఖ్యలపై బీజేపీ తీవ్రంగా స్పందించింది. ఆమె మాటలు పార్లమెంట్ సభ్యులను అవమానించడమేనని బీజేపీ అధికార ప్రతినిధి షెహజాద్ పూనావాలా ఆరోపించారు. సహచర ఎంపీలను కుక్కలతో పోల్చడం కాంగ్రెస్ పార్టీ అసలు తత్వమేనని విమర్శించారు. చర్చలకు బదులుగా డ్రామాలు చేయడమే కాంగ్రెస్కు అలవాటు అని, రాజ్యాంగ సంస్థలను గౌరవించని పార్టీగా కాంగ్రెస్ మళ్లీ నిరూపించుకుందని అన్నారు.
రేణుకా చౌదరి దేశానికి క్షమాపణ చెప్పాల్సిందేనని బీజేపీ డిమాండ్ చేసింది. ఈ వివాదం శీతాకాల సమావేశాల మొదటి రోజునే రాజకీయ వేడి పెంచింది.