Renuka Choudhary: కాంగ్రెస్ రాజ్యసభ ఎంపీ రేణుకా చౌదరి ఇటీవల పార్లమెంట్ శీతాకాల సమావేశాల సందర్భంగా ఒక వివాదంలో చిక్కుకున్నారు. ఆమె తన కారులో ఒక పెంపుడు కుక్కను (చిన్న కుక్కపిల్లను) పార్లమెంట్ ప్రాంగణంలోకి తీసుకురావడంపై తీవ్ర చర్చ జరిగింది. అత్యంత కట్టుదిట్టమైన భద్రత ఉండే పార్లమెంట్ ఆవరణలోకి పెంపుడు జంతువును తీసుకురావడం భద్రతా నిబంధనల ఉల్లంఘనగా కొందరు భావించారు. అయితే, ఆమె ఆ కుక్క ప్రమాదంలో ఉందని దాన్ని రక్షించేందుకు తీసుకువచ్చానని, వెంటనే ఇంటికి పంపించానని వివరణ ఇచ్చారు.
ఈ సంఘటనపై మీడియా ప్రశ్నించగా, రేణుకా చౌదరి చేసిన వ్యాఖ్యలు ఈ వివాదాన్ని మరింత పెంచాయి. ఆమె “కరవడానికి మనుషులు పార్లమెంట్ లోపలే ఉన్నారు” అంటూ సంచలన వ్యాఖ్యలు చేశారు. ఈ వ్యాఖ్యలు నేరుగా ఇతర ఎంపీలను ఉద్దేశించినవిగా భావించిన బీజేపీ సభ్యులు తీవ్రంగా అభ్యంతరం వ్యక్తం చేశారు. రేణుకా చౌదరి వ్యాఖ్యలు పార్లమెంట్ గౌరవాన్ని, సభా సభ్యుల హోదాను కించపరిచేలా ఉన్నాయని బీజేపీ నేతలు ఆరోపించారు. ఆమె చేసిన వ్యాఖ్యలు అనుచితమని, ఇది సభ్యుల హక్కుల ఉల్లంఘన కిందకు వస్తుందని బీజేపీ ఎంపీలు మండిపడ్డారు.
రేణుకా చౌదరి వ్యాఖ్యలపై బీజేపీ ఎంపీలు బాలగోస్వామి, బ్రిజ్లాల్లు ఆమెకు వ్యతిరేకంగా రాజ్యసభ ఛైర్మన్కు ప్రివిలేజ్ నోటీసులు సమర్పించారు. ఈ నోటీసులను స్వీకరించిన రాజ్యసభ ఛైర్మన్, వాటిని తదుపరి పరిశీలన కోసం ప్రివిలేజ్ కమిటీకి పంపించారు. ఈ కమిటీ నోటీసులను విశ్లేషించి, రేణుకా చౌదరిపై తగిన చర్య తీసుకోవాలా వద్దా అనే దానిపై నిర్ణయం తీసుకునే అవకాశం ఉంది. ఇది రేణుకా చౌదరికి ‘బిగ్షాక్’ గా పరిగణించబడుతోంది.