Ganesh Chaturthi 2025: వినాయక చవితిని గణేష్ చతుర్థి అని కూడా అంటారు. భాద్రపద మాసం శుక్ల పక్ష చతుర్థి రోజున వినాయకుడు జన్మించాడని పురాణాలు చెబుతాయి. అందుకే ప్రతి సంవత్సరం ఈ రోజున వినాయక చవితి పండుగను జరుపుకుంటారు. అయితే, ఈ పండుగ రోజున చంద్రుణ్ణి చూడకూడదని పెద్దలు చెబుతుంటారు. ఒకవేళ చూస్తే ఏమవుతుంది? దాని వెనుక ఉన్న కథేంటో ఇప్పుడు తెలుసుకుందాం.
వినాయకుడి పుట్టుక, చంద్రుడి శాపం
పార్వతీదేవి తన శరీరానికి అద్దుకున్న నలుగుపిండితో ఒక బాలుడి బొమ్మను తయారు చేసి, దానికి ప్రాణం పోసింది. ఆ బాలుడిని వాకిలి వద్ద కాపలా ఉంచి తాను స్నానానికి వెళ్ళింది. అప్పుడు అటుగా వచ్చిన శివుడిని ఆ బాలుడు అడ్డుకున్నాడు. కోపంతో శివుడు ఆ బాలుడి తల ఖండించాడు. దీనికి పార్వతీదేవి చాలా బాధపడింది. ఆమె బాధను చూసి శివుడు ఒక ఏనుగు తలను తెచ్చి ఆ బాలుడికి అతికించి తిరిగి ప్రాణం పోశాడు.
అదే రోజు, అంటే భాద్రపద శుద్ధ చవితి నాడు, శివుడు ఆ బాలుడికి గణాలన్నింటికీ అధిపతిగా నియమించాడు. దీనితో ఆ బాలుడు ‘వినాయకుడు’గా, ‘గణపతి’గా పేరు పొందాడు. ఆ రోజున భక్తులు సమర్పించిన ఉండ్రాళ్ళు, కుడుములు, వంటి పిండివంటలు పుష్టిగా తిన్న వినాయకుడు కైలాసం చేరుకునేటప్పుడు నడవలేక ఇబ్బంది పడ్డాడు. శివుడి తలపై ఉన్న చంద్రుడు వినాయకుడి అవస్థను చూసి నవ్వాడు. దానితో కోపించిన పార్వతీదేవి “ఎవరైతే ఈ రోజు చంద్రుణ్ణి చూస్తారో వారికి నిందలు, అపవాదులు తప్పవు” అని చంద్రుడికి శాపం ఇచ్చింది.
శాపానికి కారణం, పరిష్కారం
చంద్రుడి శాపం వల్ల దేవతలు, మహర్షులు కూడా ఇబ్బందులు పడ్డారు. దీనితో వారంతా బ్రహ్మదేవుడితో కలిసి పార్వతీదేవిని వేడుకున్నారు. “అమ్మా, నీ శాపం వల్ల అందరూ ఇబ్బందులు పడుతున్నారు, దానిని ఉపసంహరించుకో” అని కోరారు. అప్పుడు పార్వతీదేవి శాపాన్ని సవరించింది. “ఏ రోజున చంద్రుడు వినాయకుడిని చూసి నవ్వాడో, ఆ ఒక్క రోజు మాత్రమే చంద్రుణ్ణి చూడకూడదు” అని చెప్పింది. ఆ రోజునే మనం వినాయక చవితిగా జరుపుకుంటున్నాం.
ఈ కారణంగానే వినాయక చవితి రోజున పొరపాటున కూడా చంద్రుణ్ణి చూడకూడదని చెబుతుంటారు. ఒకవేళ అనుకోకుండా చంద్రుణ్ణి చూస్తే “సింహః ప్రసేనమవధీత్సింహో జాంబవతా హతః. సుకుమారక మారోదీస్తవ హ్యేష స్యమంతకః” అనే మంత్రాన్ని జపించడం ద్వారా ఆ దోషం తొలగిపోతుందని పురాణాలు చెబుతున్నాయి. ఈ మంత్రం సూర్యుడిపై ఉన్న అపవాదును తొలగించడానికి సాయపడిందని నమ్ముతారు.